युकेभरि माघेसंक्रान्ति मनाइँदै

लण्डन । मगरहरुको राष्ट्रिय चाड माघेसंक्रान्ति युकेभरि विभिन्न कार्यक्रमका साथ मनाइँदै छ ।
मगर संघ युकेका विभिन्न शाखाहरुको आयोजनामा युकेभरि कार्यक्रम गरिँदैछन् ।

मगर संघ, युनाइटेड ह्याम्पसायर, सर्रे, वर्कसायर शाखाले आयोजना गरेको कार्यक्रममा पितृपूजा गरी तथा तरुल लगायतका परिकार खुलाई मनाइएको थियो । ओमप्रसाद थापा, ओम बुराथोकी, सूर्य थापा, भविश्वर राना लगायतले सामूहिक पितृपूजा गरेका थिए ।
शाखाका अध्यक्ष क्याप्टेन रिटायर्ड ताम ढेँगाको अध्यक्षता र सचिव नरेश थापाको संचालनमा भएको कार्यक्रममा मगर संघ युुकेका वरिष्ठ उपाध्यक्ष राजेन रानाले युकेका मगरबन्धुहरुको सहयोगमा मगर भवन, मगर विद्यार्थीहरुहरुका लागि अक्षयकोष स्थापना भएकोमा खुशी व्यक्त गरे ।
कार्यक्रममा मगर संघ युकेका पूर्व अध्यक्ष मेजर रिटायर्ड कुल थापा, पूर्व अध्यक्ष थर्क राना लगायतको उपस्थिति रहेको थियो । शाखाका पूर्व अध्यक्ष लेफ्टिनेण्ट रिटायर्ड सुनिल रानाले सो क्षेत्रका जीसिएसइ र उ लेबलमा उत्कृष्ट विद्याथीहरुलाई परिचय र सम्मान गराएका थिए ।
कार्यक्रममा नेपालबाट आएका गायक श्रीराम थापा र कल्पना गुरुङले दोहोरी प्रस्तुत गरेका थिए भने क्याप्टेन रिटायर्ड वीरबहादुर गाहा, तुलचन्द्र तिलिजा, भीम आलेले गीत गाएका थिए । साँस्कृतिक कार्यक्रमको संयोजन लक्षु राना र तुलसी रानाले गरेका थिए ।
कार्यक्रममका उपसंयोजक रिसिराम रानाको समूहले कार्यक्रमको प्राविधिक पक्ष व्यवस्थापन गरेको थियो भने महिला समितिकी अध्यक्ष पदम थापा र सचिव धना रोकाको समूहले आगन्तुकहरुलाई स्वागत र खानाको व्यवस्थापन गरेको थियो ।
कार्यक्रममा प्रथम नौमती बाजा गुल्मीले नौमती बाजाको रौनक प्रस्तुत गरेको थियो ।
सो कार्यक्रममा बितेको वर्षमा सो क्षेत्रमा दिवंगत भएका मगरहरुको सम्झनामा एक मिनेट मौनधारण पनि गरिएको थियो ।
यसैगरी सोही दिन वेल्समा पनि माघेसंक्रान्ति कार्यक्रम सम्पन्न भएको छ । मगर संघ वेल्सको आयोजनामा भएको कार्यक्रममा मगर संघ युकेका उपाध्यक्ष नेम थापा सहभागी भएका थिए कार्यक्रममा गायक मनसुधन थापा लगायतले साँस्कृतिक कार्यक्रम प्रस्तुत गरेका थिए ।
यस्तैगरी, प्लमस्टिड, केन्ट, वेम्व्ली, हाउन्स्लो, रेडिङ र क्याटरिकमा आगामी शनिबार माघेसंक्रान्ति कार्यक्रम हुँदैछन ।