लण्डन । मगरहरुको राष्ट्रिय चाड मनाउन बेलायतका मगरहरु लागि परेका छन् ।
यसैक्रममा रसमुर, बर्कसायर, ह्याम्पसायर, सर्रे क्षेत्रमा बसोबास गर्ने मगरहरुले सामुयल कोडी स्पोर्टस् सेन्टर, फार्नब्रोमा माघेसंक्रान्ति मनाउने भएका छन् ।
आगामी शनिबार (जनवरी ९) माआयोजना हुने सो कार्यक्रममा मगरहरुले पुख्र्यौलीदेखि मान्दै आएको पितृ पूजा गरिने पूजा संयोजक ओमप्रसाद थापामगरले जानकारी दिए ।
आफ्ना दिवंगत पितृहरुलाई सम्झेर पूजा गरेपछि खिचडी, कन्दमुल, फलफूल प्रसाद, नैवेद्य चढाउन सकिने पनि थापाले बताए । बेलायतको ब्यस्तताको बाबजूद भक्तजनहरूले चढाएकाे फूलप्रसाद पुजारीले भाेलिपल्ट बिहानै नजिककाे नदीमा गएर सामूहिक पूजा गरी चढाउने तथा विसर्जन गर्ने गर्दछन् ।
मगर संघ युनाइटेड सर्रे, ह्याम्पसायर, वर्कसायर समितिको आयोजनामा हुने सो कार्यक्रममा पितृ पूजाका साथमा नौमती बाजा बजाएर शुभसाइत गरिने, प्रसादग्रहण, शुभकामना आदानप्रदान, उल्लेखनीय कार्य गर्नेलाई सम्मान र साँस्कृतिक कार्यक्रम पनि समावेश छन् ।
कार्यक्रममा भाग लिन आयोजकले सबैलाई आग्रह गरेका छन् ।