लण्डन । नेपालमा पार्टी एकीकरणपछि युकेमा पनि सङ्घीय समाजवादी र खस समावेशी पार्टीबीच समायोजन अन्तिम चरणमा पुगेको छ ।

खस समावेशी पार्टी, मधेसी जनअधिकार फोरम र सङ्घीय समाजवादी पार्टी, नेपाल बीच तीन महिनाअघि एकीकरण भएकाे थियाे । एकीकरणपछि सङ्घीय समाजवादी फोरम, नेपाल संसदमा ५ औ ठूलो पार्टी बनेेकाे छ । तत्कालिन तीन वटै पार्टीका प्रवास अंगको रुपमा क्रियाशिल युकेको संगठनहरुबीच समाजोजन प्रकृया अघि बढाउन सहमति भएकाे हाे ।

समायोजनमा खस समावेशी पार्टी नेपाल युके समितिको तर्फबाट केन्द्रीय वैकल्पिक सदस्यमा टेक बहादुर थापा ‘राजेश’, युके समितिको उपाध्यक्षमा इन्द्र खस कार्की, सदस्यहरुमा नविन थापा, बिकेश बस्नेत, सूर्य कार्की र सल्लाहकारमा राजेन्द्र बस्नेतलाई संघीय समाज युकेमा समाहित गरिएको छ ।

यस समायोजनसंगै नेपाली सङ्घीय समाज युके ३३ सदस्सीय बन्न पुगेको छ भने समितिमा ६ जना उपाध्यक्ष र भगवान चाम्लिङसहित केन्द्र काठमाण्डौको लागि २ जना केन्द्रीय वैकल्पिक सदस्य रहेकाे समायोजन संयोजक तथा उपाध्यक्ष बलकृष्ण राईले बताए ।

समाजको बार्षिक साधारण सभा यही ९ जनवरी २०१६ का दिन नर्थाेल्ट लण्डनमा आयोजना गरिएको छ । सोही दिन औपचारिक समायोजनको घोषणा तथा सपथ गराइने कार्यक्रम रहेको छ । दोस्रो चरणमा मधेशी जनअधिकार फोरमको युके संगठनसंग समायोजन गरिने छ ।