गायिका सुनिता दुलाल ७ मा लन्डन आउने

लन्डन । दुई चर्चित नेपाली गायिकाले चिसिंदो बेलायती मौसम तताउंदै छन् यो महिनाभर । गोर्खा सांस्कृतिक सांझका लागि गायिका इन्दिरा जोशी शुक्रबार यूके आइसकेकी छिन् भने अर्की लोकप्रिय गायिका सुनिता दुलाल आगामी ७ जनवरीमा लन्डन उत्रने भएकी छन् ।

ब्रिटिश गोर्खा नेपलिज काउन्सिलले गर्ने सांस्कृतिक कार्यक्रममा भाग लिन उनी यो साता यूके आउन लागेकी हुन् । अलिक अस्वस्थ्य र व्यस्तताले सुनिता एकसाता पछि इन्दिरालाई साथ दिन आइपुग्ने छिन् ।

आज सांझ फार्नबोरोबाट शुरु हुने गोर्खा सांस्कृतिक सांझ फेब्रुअरी पहिलो सातासम्म बेलायतका दर्जन शहरमा हुने तय भएको छ । जोशी र दुलाललाई नेपालबाटै आएका नृत्य निर्देशक गोविन्द राईसहित स्थानीय कलाकारहरुले पनि साथ दिनेछन् ।

गायिका ज्योति मगरलाई बेलायत झिकाउन लागेको काउन्सिलले उनको भिजा रिफ्युज भएपछि यी दुई गायिका बोलाएको हो । नेपाली संगीत क्षेत्रमा दुवै गायिकाको बेग्लै क्रेज छ अहिले ।