व्यवसायी श्रेष्ठ अब गीतकार

लन्डन । अध्यापन क्षेत्रमा लामो समयदेखि आवद्ध बेलायतका एक जना नेपाली व्यवसायी यादवकुमार श्रेष्ठ अब गीतकार भएका छन् । लन्डनस्थित साउथ लन्डन एकेडेमीसंग आवद्ध उनको पहिलो गीत ‘नजर तिम्रो…’ रेडिङस्थित रेडिपप स्टुडियोमा रेकर्डिङ भएको छ । श्रेष्ठको गीत वरिष्ठ गायक आनन्द कार्कीको स्वर र संगीतकार शिखर सन्तोषको संगीतमा रेकर्ड भएको हो । यसको संगीत संयोजन किरण कंडेलले गरेका छन् ।

‘संगीत र साहित्यमा रुची भएपनि गीतकार हुने लक्ष्य पटक्कै थिएन’, श्रेष्ठले गीत रेकर्ड भएपछि वीनेपालीसंग भने, ‘गायक आनन्द कार्की र संगीतकार शिखर सन्तोषसंगको एक भेटमा मैले एउटा सायरी सुनाएको थिएं, उहांहरुले त्यो सुनेर गीत नै लेख्न प्रेरित गर्नुभयो ।’

श्रेष्ठले भविष्यमा अन्य गीत पनि विस्तारै रेकर्ड गराउने योजना सुनाए । उनी आफ्नो पहिलो गीतको म्यूजिक भिडियो समेत बनाउने सुरमा छन् ।

सन् २००६ को अन्तिमतिर बेलायत आएका श्रेष्ठ क्याट यूके, पासा पुचः गुठी यूके लगायत विभिन्न सामाजिक संघसंस्थामा आवद्ध छन् ।

यसैबीच, अर्का व्यवसायी ओमकार अधिकारीले पनि गायक कार्की र संगीतकार सन्तोषसंग गीत रेकर्ड गराएका छन् । उनको गीतको बोल छ ‘जमाना फेरियो…।’

रेकर्डिष्ट क्लाउड राचेर्टले श्रेष्ठ र अधिकारीको रेकर्ड गराएका थिए ।

यसअघि कार्की र सन्तोष बेलायत भ्रमणमै रहेको मौका छोपी गायक गायिका सपनकुमार राई र शर्मिला बर्देवाको गीत पनि रेकर्ड भएको थियो ।