लन्डन । नौलो लाग्दैन बेलायतको नेपाली डायष्पोरामा सपनकुमार राई र शर्मिला बर्देवाको नाम । उनीहरु दुवै नेपाली सांगीतिक क्षेत्रमा समर्पित छन् । शर्मिला गाउंछिन्, सपन बजाउने गाउने दुवै गर्छन् । सबैले चिन्ने यो जोडी १७ वर्षपछि फेरि न्यानो अंगालोमा बांधिएको छ संगीतका माध्यमबाट ।
अहिलेका चल्तीका संगीतकार शिखर सन्तोष बेलायत आएका बेला बर्देवा र राईले भर्खर एउटा गीत रेकर्ड गराएका छन् । सन् १९९८ मा ड्वेट गाएको यो जोडीले यसपटक प्रकाश पुन्जले लेखेको गीत ‘मेरो मनमा बस मेरो मटुमा बस, तिम्रो न्यानो अंगालोमा चोखो मायाले कस…’ गीत रेकर्ड गराएको हो । साउथहलस्थित एउटा स्टुडियोमा ओविइ प्राप्त कुलजित भाम्राले उक्त गीत रेकर्ड गराएका हुन् । ५ मिनेट लामो गीतको म्यूजिक भिडियो समेत बनाउने योजनामा छ यो जोडी ।
‘गीत एकदम रोमान्टिक खालको छ’, गायिका शर्मिलाले भनिन्, ‘गीत मन पर्यो । अनि अब्बल संगीतकार यहीं आएको बेला रेकर्ड गरौं न त भनेर हामीले गाएका हौं ।’
यही गीत आफ्नो सातौं एल्बममा समेत समावेश हुने शर्मिलाले जनाइन् । उनको आगामी एल्बमका लागि चारवटा गीत रेकर्ड भइसकेको छ ।
१४ वर्षअघि बेलायत आएकी शर्मिला यहां पनि उत्तिकै सक्रिय छिन् । उनले करिब डेढवर्ष अघि गायक विवेक श्रेष्ठसंग मिलेर ‘चिनो’ नामक एल्बम निकालेकी थिइन् ।
दुई दशकभन्दा बढि समयदेखि बेलायत रहेका सपन इन्टरटेनमेन्ट लि.का प्रोपाइटर राईले बेलायतमा हुने धेरै कार्यक्रममा साउण्ड र डिजेका साथ गायनको जिम्मेवारी वहन गर्दै आएका छन् । उनको कम्पनीले नेपालबाट नियमित जस्तो कलाकार झिकाएर यहां कार्यक्रम गर्ने गर्छ ।
