सन् २०१५ युरोपका लागि दुःखद वर्ष, आतङ्कवाद र आप्रवासी मुख्य झमेला

काठमाडौं, ११ पुस । एक जमानामा समृद्धि, विकास र सुरक्षाको पर्याय बनेको युरोप यतिखेर भने विभिन्न समस्याको जालोमा फसेको छ । दोस्रो विश्वयुद्धपछि विश्वमा सम्पन्नताको सफल उदाहरणका रुपमा उदाएको युरोपलाई अहिले सुरक्षादेखि अर्थतन्त्रसम्मको अप्ठेराले घेरेको छ ।
त्यसैले कतिपयले भन्ने गरेका छन् विश्वयुद्धपछिको विश्व संरचनाले अब युरोपलाई धान्न सक्ने अवस्था छैन । एकातर्फ युरोपकै देशहरु एक अर्काेगरी आर्थिक मन्दीमा फस्दैछन् भने अर्कातर्फ उनीहरुको सम्पन्नतामा असुरक्षाको आँखा लाग्न थालेको पनि भान हुन थालेको छ ।
युरोप पछिल्लो समयमा आतङ्कवादको तारो हुने गरेको अवस्थालाई विश्वका कतिपय विश्लेषकहरुले यसरी पनि बुझेका छन् । त्यसैमा पनि सन् २०१५ त युरोपका लागि निकै नै कष्टकर बन्न पुगेका समाचारहरु संसारभर नै छाए । सुरुका दिनहरुमा पेरिसको हमलाकै कारण युरोपमा आतङ्कको त्रास फैलियो भने पछिल्लो समयमा आप्रवासीले पनि युरोपलाई नै गन्तब्य बनाएका कारण युरोप संसारको समाचार बन्यो । त्यस्तै वर्षको उत्तराद्र्र्धमा पनि पेरिसमा नै हमला गरी वरिपरीका सारा युरोपेली देशहरुलाई समेत खतरामा रहेको सङ्केत गर्दै यस वर्ष बिदाइको निकटमै छ ।

गत नोभेम्बर १३ मा फ्रान्सको राजधानी पेरिसमा आइएस नामको इस्लामिक अतिवादी संगठनका नामबाट भन्दै आक्रमण भयो र त्यसमा परी १३० जनाभन्दा बढीको ज्यान गयो । त्यसमा परी ३०० जनाभन्दा बढी नराम्ररी घाइते भए र तीमध्ये आधाआधी जति अहिले पनि अस्पतालमै छन् ।

पेरिसमा गरिएको आतङ्ककारी आक्रमण यस वर्षको पहिलो होइन । सन् २०१५ मा गरिएको यो दोस्रो हमला थियो । वर्षको सुरुमै त्यहाँ यसै आतङ्ककारी संगठनको आक्रमण भएको थियो र सो आक्रमणबाट १४ जनाको ज्यान गएको थियो । उनीहरुले पेरिसमै रहेको एक पत्रिकाको कार्यालयमा हमला गरे र सम्पादकसहित ती व्यक्तिको हत्या गरेका थिए ।

यसरी वर्षको सुरुवातसँगै युरोपमा आतङ्ककारी हमला सुरु भएको थियो । त्यसपछि लगभग युरोपभरि नै यसवर्ष आतङ्कको त्रास रह्यो । वर्षको उत्तराद्र्धमा भएको पेरिसकै अर्काे यस हमलाले यतिखेर युरोपभरि नै त्रास छाएको छ । यस आक्रमणको छिटा अरुतिर पनि पर्ने त्रासमा आज सिङ्गो युरोपभरि कडा सतर्कता अपनाइएको छ ।

पेरिसमा भएको यो पछिल्लो आक्रमणसँग युरोपका धेरै देशको नाम मुछिएको छ । जानीजानी आतङ्ककारीहरुले पेरिस वरिपरीका देशहरुमा बसेर यो आक्रमणको जालो बुनेको रहस्य पछि आएर खुल्दै गएको छ । उनीहरुले यो आक्रमणका लागि वर्षदिन पहिलादेखि योजना बनाएका रहेछन् र त्यसको प्रमुखस्थल बेल्जियम रहेछ । पेरिसका विभिन्न सात स्थानमा भएका हमलामध्ये धेरैको ज्यानलिने स्टेडियमको हमलाका मुख्य योजनाकारको बासस्थान बेल्जियममा थियो । उसले नै त्यस आक्रमणका लागि सबैलाई तयार पारेको तथ्य उसको घरबाट प्राप्त प्रमाणहरुले देखाएको थियो ।
त्यस्तै सो आक्रमणका लागि उनीहरुले हतियार जर्मनीमा किनेको अर्काे तथ्य पनि अनुसन्धानका क्रममा नै खुलेको हो । जर्मनीको एक दैनिक पत्रिकाले हालै प्रकाशन गरेको समाचारमा सो समाचार बाहिर आएको हो । उनीहरुले जर्मनीको बजारबाट शक्तिशाली हतियार खरिद गरेको देखिएको सो समाचारमा जनाइएको थियो । यसबाट उनीहरुले बेल्जियम तथा जर्मनीमा पनि हमलाको योजना गरेका पनि भेटिएको थियो ।

यता पेरिसमा वर्षमा दुई दुई पटकसम्म यसरी आतङ्कवादी हमला भएको भनी चर्चा भइरहँदा बेलायतका प्रधानमन्त्री डेभिड क्यामरुनले भने बेलायतले यसैवर्षमात्र यस्ता सम्भावित पाँचवटा आतङ्ककारी हमलालाई आफ्नो देशले निस्तेज पारेको बताउनुभएको थियो । उहाँले आतङ्ककारीहरुले बेलायतलाई पनि तारो बनाएका तर साना ठूला गरी बेलायतले यसवर्षकामात्र ती योजनालाई असफल तुल्याइदिएको जानकारी दिनुभएको थियो । यसबाट बेलायत पनि आतङ्कारी आक्रमणको तारोमा थियो भन्ने अर्काे तथ्य पनि बाहिर आएको छ ।

फ्रान्सको सो हमालपछि पनि आतङ्ककारीहरुले समय समयमा विभिन्न युरोपेली देशमा आक्रमणको धम्की दिए । कहिले कुन देशको त कहिले कुनको हवाई जहाजमा बम राखिएका तथा विभिन्न पार्क, विद्यालय वा नाट््यशालाहरुमा बम राखिएका र हमला हुनसक्ने भनी चेतावानी पनि दिने गरिएका समाचारहरु आएका थिए ।