वासिङ्टन, १७ मङ्सिर । अमेरिकी राष्ट्रपति बाराक ओबामाले बेलायतको संसदले इस्लामिक स्टेट (आईएस) विरुद्ध कारबाही गर्ने भनी गरेको मतदानको स्वागत गर्नुभएको छ ।
बेलायतको संसदले हालैमात्र सो निर्णय गरेको थियो । बेलायतको संसदमा सरकारले राखेको आईएसका विरुद्धको कारबाहीमा अन्तर्राष्ट्रिय अभियानमा सामेल हुने भन्ने सरकारको प्रस्तावका पक्षमा निर्णय गरेको थियो ।
सिरियामा आईएसका विरुद्धमा जारी रहेको कारबाहीमा बेलायतले पनि ऐक्यबद्धता जनाउने भएको हो ।
अमेरिकी राष्ट्रपति ओबामाले बिहीबार एक विज्ञप्तिमा भन्नुभएको छ– अब बेलायती विमानहरू पनि आतङ्कवादविरुद्धको कारबाहीका लागि सिरियाली आकासमा सहकार्य गर्ने भएकोमा हामीलाई खुसी लागेको छ ।
हाल त्यहाँ संयुक्त राज्य अमेरिकाका साथै फ्रान्सले पनि कारबाही गरिरहेको छ । सो कारबाहीमा अब बेलायतले पनि प्रतिबद्धता जनाएपछि अमेरिकाले त्यसको स्वागत गरेको हो ।
गत नोभेम्बर १३ मा फ्रान्सको राजधानी पेरिसमा भएको आतङ्कवादी हमलामा १३० जनाको हत्या गरिएपछि सो हमलापछि आईएसविरुद्धको कारबाही सुरु भएको हो ।
सो हमलाको जिम्मेवारी आईएसले लिएपछि त्यसका बिरुद्ध कारबाहीका लागि विश्वव्यापी रूपमा अमेरिकाले पहल गरिरहेको छ ।
अमेरिकाको आग्रहमा नै बेलायतले पनि आतङ्कवादविरुद्धको कारबाहीको नाम दिइएको उक्त अभियानमा सहभागिता जनाउने भएको हो ।
पछिल्लो समयमा सिरियामा आईएसका क्रियाकलापहरू थप तिब्र भएको बताइन्छ । त्यसैले अमेरिकी नेतृत्वमा यस कारबाही सुरु गरिएको बताइएको हो ।