हन्स्लोमा गाउंदैछन् गायक आनन्द कार्की

लन्डन । वरिष्ठ गायक आनन्द कार्कीले आगामी ४ डिसेम्बर, शुक्रवार सांझ हन्स्लोस्थित काठमाण्डौं जोन रेष्टुरेन्टमा गायन प्रस्तुत गर्ने भएका छन् । सांझ ७ बजेदेखि शुरु हुने सांस्कृतिक सांझमा कार्कीलाई संगीतकार शिखर सन्तोषले पनि साथ दिंदैछन् । कार्यक्रममा प्रवेश शुल्क १० पाउण्डमात्र तोकिएको छ । सपन इन्टरटेनमेन्टले संयोजन गरिरहेको उक्त कार्यक्रम अविष्मरणीय बनाउने प्रतिवद्धता कार्कीको छ । उनले समस्त बेलायतवासी नेपाली संगीतप्रेमीलाई कार्यक्रममा उपस्थित भइदिन पनि आग्रह गरेका छन् ।

‘थर्ड आइ’ को निम्तोमा दशैं तिहार शुभकामना कार्यक्रममा गाउन बेलायत आएका कार्की र सन्तोषले लन्डन, म्यानचेस्टर, रेडिङ, अल्डरसटमा कन्सर्ट गरेर हन्स्लोमा गाउन लागेका हुन् ।

अघिल्लो साता नेपाल फर्कने कार्यक्रम भएपनि यो जोडी दर्शकको अत्यधिक मागका कारण थप महिना दिन यूकेमै रहने भएको छ ।

तीन दशक देखि नेपाली संगीतमा क्रियाशिल कार्कीका लाग्छ मन हेरिरहुं एकनास तिमीलाई…, यी हल्लाहरु हुन् तिमिले सुनेका…, फेरि तिम्रो याद आयो… आदि अत्यधिक सुनिने गीत हुन् । उनका फिल्मी गीत र गजल पनि असंख्य छन् । अझै गायनमा उस्तै सक्रिय कार्कीको हालैमात्र चाहन्छु म तिमीलाई…एल्बम बजारमा आएको छ ।

उता, कार्कीसंगै स्टेजमा गाइरहेका शिखर सन्तोषले डेढ दर्जन बढि बलिउड फिल्ममा संगीत दिइसकेका छन् । सन्तोषका रामकृष्ण ढकाल र लता मंगेशकरले गाएको बांचुन्जेलीलाई, पहाडको छुकछुके रेल, आस्था बीको मलाई पुगेन पुगेन… आदि गीत हिट छन् । एक दशक बलिउड बसेर करिब तीनवर्ष अघि मात्र नेपाल आएका हुन् शिखर सन्तोष ।