बेलायत बसाइमा कार्की र शिखर सन्तोषलाई ‘वान्स मोर’

लन्डन । ‘वान्स मोर’ बढेपछि थप महिना दिन बेलायत बस्ने सुरसारमा छन् वरिष्ठ गायक आनन्द कार्की । ‘थर्ड आइ’ को निम्तोमा दशैं तिहार शुभकामना कार्यक्रममा गाउन बेलायत आएका कार्कीको व्यस्तता यतिखेर आकासिएको छ । ‘धेरै फ्यानहरुले हामीले कार्यक्रम नै हेर्न पाएनौं भनेपछि अरु एक महिना बेलायत बस्ने निधो गरेको छु’, तीन दशक देखि नेपाली संगीतमा क्रियाशिल कार्कीले भने ।

नेपालमा नाकाबन्दीले संगीत क्षेत्र समेत प्रभावित भइरहंदा कार्की बेलायतमै केही समय कार्यक्रम गर्न प्रेरित भएका रहेछन् । ‘देशको अवस्था सम्झंदा बडो दुःख लाग्छ’, कार्कीले सुझाए, ‘छिमेकी सधैं छिमेकी नै हुन्छ । त्यसकारण भारतसंगको चिसिंदो सम्वन्ध कुटनीतिक पहलबाट समाधान गर्न जरुरी छ ।’ नेपालमा दस्तावेजमा प्रजातन्त्र आए पनि व्यवहारमा नेपाली जनताले त्यो अनुभूति गर्न नपाएको कार्कीले बताए । ‘नेताहरुले काम थोरै गफ बढि गर्न थाले’, उनको आक्रोश थियो, ‘हामी स्वार्थका लागि बांचिरहेका छौं, नेपाल आमालाई मारिरहेका छौं ।’

कार्कीको साथमा छन् संगीतकार शिखर सन्तोष । कार्की र शिखर सन्तोषले लन्डनमा पटक पटक, म्यानचेस्टर, रेडिङ, अल्डरसट लगायत नेपाली रहेका प्रमुख शहरमा गाइसके । ‘रेडिङ र लन्डनमा फेरि कार्यक्रम गर्दैछौं’, केही दिन अघि भेटिएका गायक कार्की मख्ख थिए, ‘हामी कलाकारलाई आफ्नै परिवार र सम्पत्ति ठानेर नेपाली समुदायले माया गरेको देख्दा गर्व लाग्ने रहेछ ।’

आधुनिक गीत र गजल गायनमा पृथक पहिचान बनाएका यी गायकका हल्लाहरु हुन्, लाग्छ माया हेरिरहुं, फेरि तिम्रो याद आयो… आदि अत्यधिक सुनिने गीत हुन् । पप संगीत र नयां प्रविधिले आधुनिक गीत केही छायांमा परेको ठान्ने कार्की ‘आउट डेटेड’ भएकै हुन् ? यो आरोप स्वीकार्न राजी भएनन् उनी । भने, ‘बुढो भए पनि बाघ बाघ नै हो । यो क्षेत्रमा गुणस्तरले टिकिने हो, न कि सस्तो चर्चाले ।’ उनले नयां गायक गायिकालाई टिकेर देखाउन पनि चुनौती दिए ।

भर्खरमात्र चाहन्छु म तिमीलाई…एल्बम निकालेका कार्कीले विदेश बस्ने नेपाली डायस्पोराका कारण नेपाली संगीत प्रबर्धन  भइरहेको जनाए । कार्कीले यसपटक लन्डन बोलाउने थर्ड आइका विकास देवकोटा र सनमकुमार बैरागप्रति बढि कृतज्ञता व्यक्त गरे । उनले बेलायतमा हुन गइरहेका आफ्ना कार्यक्रम हेरिदिन पनि समस्त नेपाली संगीतप्रेमीसमक्ष आग्रह गरेका छन् ।

उता, डेढ दर्जन बढि बलिउड फिल्ममा संगीत दिइसकेका सन्तोषका रामकृष्ण ढकाल र लता मंगेशकरले गाएको बांचुन्जेलीलाई, पहाडको छुकछुके रेल, आस्था बीको मलाई पुगेन पुगेन… आदि गीत हिट छन् । एक दशक बलिउड बसेर करिब तीनवर्ष अघि मात्र नेपाल आएका शिखर सन्तोष भन्दै थिए, ‘संगीतमार्फत कलिउड र बलिउड जोड्ने प्रयास गरिरहेको छु ।’ नेपालमा बलिउड जस्तो संगीतकर्मीबीच एकता नभएको अनुभव संगालेका छन् सन्तोषले । ‘संगीत टिमवर्क हो तर नेपालमा खुट्टा तान्ने प्रवृत्ति छ’, उनको दुःखेसो थियो ।