भूकम्पमा ज्यान गुमाउनेहरूको मोक्षका लागि महायज्ञ

 

काठमाडौँ, २ मङ्सिर । वैशाखमा गएको भूकम्पमा ज्यान गुमाउनेहरूको मोक्षका लागि मङ्गलबारदेखि पशुपतिक्षेत्रस्थित भुवनेश्वरी मन्दिर प्राङ्गणमा वैदिक विधिपूर्वक श्रीमद्भागवत महायज्ञ सुरु भएको छ ।

भूकम्पमा ज्यान गुमाएका सबैको मोक्ष प्राप्ति होस् भन्ने सङ्कल्पका साथ अनुष्ठान सुरु गरिएको श्रीमद्भागवत कथा आयोजन समितिले जनाएको छ ।

मृत्यु भएका १० परिवारको वैदिक विधिपूर्वक मोक्ष प्राप्तिको सङ्कल्पका साथ गत वैशाख १२ गते गएको भूकम्पमा परी मृत्यु भएकाहरूका लागि यज्ञ गरिएको समितिका सदस्य नन्दकिशोर शर्माले जानकारी दिए ।

महायज्ञमा पुरुषोत्तम धिमालले कथावाचन गर्नेछन् । “महाभूकम्प वा अन्य कारणले मृत्यु भएकाको मोक्षको कामनासहित आफन्तजनले कर्ताका रुपमा विधानअनुसार विशेष कर्म गर्न चाहेमा त्यसको समेत व्यवस्था गरिनेछ”–शर्माले भने ।

मङ्सिर ७ गतेसम्म सञ्चालन हुने यज्ञमा भागवत कथा प्रवचन, भजन कीर्तन, सम्मान र भागवतमा आधारित झाँकी प्रस्तुत गरिनेछ । महायज्ञबाट सङ्कलित रकम यज्ञमा खर्च गरी बाँकी रहेमा भूकम्पपीडितलाई न्यानो कपडा किनी बाँडिने कथावाचक धिमालले बताए ।