बिहीबार, असोज १५ २०७७ | Thu, October 01, 2020
नेपालको समय: १४:१७ | UK Time: 09:32

महाकवि देवकोटाका कृतिको गहिरो अध्ययनमा जोड

वीनेपाली
२०७२ कार्तिक २५ गते ११:५२

163

काठमाडौँ, २५ कात्तिक । साहित्य अनुरागीहरुले महाकवि लक्ष्मीप्रसाद देवकोटाका कृतिको गहिरो अध्ययन हुनुपर्नेमा जोड दिएका छन् ।

महाकवि देवकोटाको १०७औँ जन्मजयन्तीका अवसरमा रत्न पुस्तकालयले यहाँ आयोजना गरेको कार्यक्रममा उनीहरुले देवकोटा देशको बौद्विक राष्ट्रिय चिन्तनका परिकल्पनाकार भएकाले उहाँका बारेमा अध्ययन र अनुसन्धान अझै अपर्याप्त भएको बताए ।

पूर्वअर्थमन्त्री शङ्करप्रसाद कोइरालाले नाकाबन्दीले नेपालीहरुको मानसिकता कमजोर बनाएको बेला महाकविको निबन्ध ‘के नेपाल सानो छ ?’ अध्ययन गरेर उत्प्रेरणा लिनुपर्ने बताए ।

नेपाल प्रज्ञाप्रतिष्ठान कुलपति गङ्गाप्रसाद उप्रेतीले महाकविका कृतिको अत्यधिक समालोचकले समालोचना गरेतापनि उहाँका कृतिमा भएको गहनताका कारण पर्याप्त भने नभएको बताए ।

महाकविका सुपुत्र डा पद्मप्रसाद देवकोटाले महाकविको सौन्दर्य चेतनाबारे अध्ययन गर्नुपर्ने बताए । उनले महाकविको भौतिकभन्दा बौद्विक सम्पदा महत्वपूर्ण भएकाले राज्यको ध्यान त्यसतर्फ जानुपर्नेमा जोड दिए ।

सांसद मनमोहन भट्टराई, पुस्तकालयका अध्यक्ष शशीविक्रम राणा, स्रष्टा पद्मसिंह कार्की, विद्यालयका प्रधानाध्यापिका गीता खरेल शिवाकोटीलगायतले महाकवि देवकोटाका बारेमा वैज्ञानिक ढङ्गले अध्ययन हुनुपर्नेमा जोड दिए ।

कार्यक्रममा रत्न पुस्तकालयले महाकवि देवकोटालगायतका विभिन्न साहित्य कृतिलाई समेटेर तयार पारेको पुस्तक ‘पूजा’ को लोकार्पण गरिएको थियो ।

सोही अवसरमा रत्नराज्य विद्यालयमा विगत ४६ वर्षदेखि सेवा पुरयाएकी ९० वर्षीया वृद्वा मिश्री महर्जनलाई दोसल्ला ओढाएर सम्मान गरिएको थियो । साथै, जन्मजयन्तीकै अवसरमा रक्तदान कार्यक्रम पनि आयोजना गरिएको थियो ।

प्रतिक्रिया

सम्बन्धित सामाग्री

फेसबुक