सभापति सुशील कोइराला क्यान्सरमुक्त

काठमाडाँैं, २५ कात्तिक । नेपाली काँग्रेसका सभापति एवम् पूर्व प्रधानमन्त्री सुशील कोइराला क्यान्सरमुक्त भएका छन् ।

स्वास्थ्य परीक्षणका लागि हाल संयुक्त राज्य अमेरिकामा रहेका सभापति कोइरालाको स्वास्थ्य परीक्षण प्रतिवेदन हेरेपछि चिकित्सकले उनी क्यान्सरमुक्त भएको बताएको स्वकीय सचिव अतुल कोइरालाले टेलिफोनबाट जानकारी दिए ।

अमेरिकाको न्यूयोर्कस्थित मेमोरियल स्लोन केटरिङ क्यान्सर सेन्टरमा उनको छाती, जिब्रो र घाँटीको एक्सरेसहित अन्य परीक्षण गरिएको थियो । सेन्टरका वरिष्ठ चिकित्सक डा मञ्जित बेन्सको नेतृत्वमा उनको स्वास्थ्य परीक्षण हुँदै आएको थियो ।

स्वकीय सचिव अतुल कोइरालाका अनुसार चिकित्सकले उनलाई छ महिनामा पुनः रिपोर्ट गर्न सुझाव दिएका छन् ।

न्यूयोर्कबासी नेपालीसँग भेट
सभापति कोइराला मङ्गलबार साँझ नेपाली जनसम्पर्क समिति न्यूयोर्क च्याप्टरद्वारा आयोजित स्वागत कार्यक्रम र रात्रिभोजमा सरिक भए ।

उनले संविधानसभाबाट संविधान जारी हुनु ऐतिहासिक उपलब्धि भएको बताउँदै तराई–मधेस समस्याको समाधान आपसी संवादको माध्यमबाट हुनुपर्ने बताएका थिए ।

उनले समस्याको शान्तिपूर्ण समाधान गरी मुलुकको सार्वभौमिकता, अखण्डता र एकता कायम गर्दै शान्ति, स्थायित्व र विकासका लागि आफ्नो नेतृत्वको सरकारले संविधान संशोधनको विधेयक दर्ता गराएको जानकारी गराए ।