शनिबार, असोज १० २०७७ | Sat, September 26, 2020
नेपालको समय: ०४:३२ | UK Time: 23:47

वीरगन्ज तनावग्रस्त, ३ बजेदेखि निषेधाज्ञा

वीनेपाली
२०७२ कार्तिक १६ गते १०:०९
1446453629503_BM-Parsa naka khuleyo-01

चालिस दिनदेखि अवरुद्ध रहेको वीरगन्ज नाकालाई प्रहरीले हस्तक्षेप गरी खुल्लाएपछि दुई महिनादेखि नेपालतर्फ थन्किएका वाहनलाई भारततर्फ पठाउने र भारतीय पक्षसँगको समन्वय सल्लाहपछि भारतमा थन्किएका वाहनलाई नेपाल भित्र्याउने कार्य सुरु गरिने पर्साका प्रजिअ केशवराज घिमिरेबाट जानकारी । तस्बिर ः विजयकुमार महतो पर्सा, रासस

वीरगन्ज, १६ कात्तिक । प्रहरीले प्रहार गरेको गोली लागि शंकराचार्य गेट (नेपालको मुल प्रवेशद्वार) निर एक प्रदर्शनकारीको मृत्यु भएपछि बीरगन्ज तनावग्रस्त बनेको छ । तनावबीच, जिल्ला प्रशासन कार्यालय पर्साले वीरगन्ज नगरक्षेत्रका केही स्थानमा आज अपराह्न ३ बजेदेखि अनिश्चितकालीन निषेधाज्ञा जारी गरेको छ ।

जिल्ला सुरक्षा समितिको आज बसेको बैठकले नेपाल–भारत सीमा नाकास्थित शङ्कराचार्यद्वारदेखि इनर्वा, बाइपास, नया बसपार्क, पावरहाउस चोक, राधेमाई क्षेत्र, आदर्शनगर र छपकैया लगायतका क्षेत्रमा अर्को आदेश नभएसम्मका लागि निषेधाज्ञा लगाइएको प्रजिअ केशव घिमिरेले बताए ।

स्थानीय प्रशासन ऐन, २०२८ को दफा ६ को उपदफा ३ र ३ (क) बमोजिम निषेधाज्ञा जारी गरिएको क्षेत्रमा एकै ठाउमा पाच वा सोभन्दा बढी व्यक्ति भेला हुन पाइने छैन । निषेधाज्ञा उल्लङ्घन गर्ने प्रयास गरेमा सुरक्षाकर्मीले कानुनबमोजिम कारबाही गर्न र उक्त क्षेत्रमा कुनै किसिमको हिंसात्मक कार्य गर्नेमाथि गोलीसमेत हान्न सक्नेछ ।

उता, नेपाल–भारत सीमास्थित मितेरी पुलमा धर्नामा बस्दै आएका आन्दोलनकारीलाई सुरक्षाकर्मीले बल प्रयोग गरेर आज विहान हटाएको विरोधमा वीरगन्जका विभिन्न ठाउँमा प्रदर्शन सुरु भएको छ ।

प्रदर्शनकारीले बिहानदेखि नै वीरगन्जको नगवा, बिर्ता, घन्टाघर, बसपार्क, मुर्लीचोक, राधेमाई चोक, रानीघाटलगायत सहरका विभिन्न भागमा बाटोमा टायर बालेर प्रदर्शनमा उत्रिएका छन् । प्रदर्शनकारी र प्रहरीबीच वीरगन्जमा पटकपटक भइरहेको झडपका कारण यहाँको जनजीवन त्रसित बनेको छ ।

वीरगन्ज उपमहानगरपालिकाको घन्टाघर, नगवा, माईस्थान, छपकैया र मुर्लीचोक लगायतका ठाउँमा प्रदर्शनकारी र प्रहरीबीच बिहानदेखि पटकपटक झडप भइरहेको छ । यथार्थ तथ्याङ्क उपलब्ध नभए पनि स्थिति नियन्त्रणमा लिन सुरक्षाकर्मीले दिउँसो ११ः३० बजेसम्म आधा दर्जन हवाई फायर र दर्जनौँ राउन्ड अश्रुग्यास प्रहार गरेको सुरक्षा स्रोतले जनाएको छ ।

विभिन्न नारा लगाउँदै प्रदर्शनमा उर्लिएका प्रदर्शनकारीले सुरक्षाकर्मीमाथि ढुङ्गामुढा गरिरहेका छन् । स्थितिलाई नियन्त्रणमा लिन व्यापक मात्रामा सुरक्षाकर्मीलाई परिचालन गरिएको छ । स्थिति अराजक हुन नदिन आवश्यक सम्पूर्ण उपाय अवलम्बन गर्ने पर्साका प्रमुख जिल्ला अधिकारी केशवराज घिमिरेले बताए ।

यसअघि आज विहान करिब ५ बजे सुरक्षाकर्मीले धर्नामा बसेका आन्दोलनकारीलाई बल प्रयोग गरेर हटाएपछि नेपालतर्फ रोकिराखिएका भारतीय ट्रकहरुलाई भारततर्फ पठाइएको जिल्ला प्रहरी कार्यालय पर्साले जनाएको छ । आन्दोलनकारीहरुको धर्नाका कारण विगत एक महिनादेखि बीरगन्ज नाकामा रोकिएर बसेका भारतीय नम्बरका दर्जनौं ट्रकहरुलाई सिमावर्ती भारतीय शहर रक्सौलतर्फ पठाइएको बताइएको छ ।

आन्दोलनका कारण नेपालतर्फ रोकिएका भारतीय ट्रकमध्ये बिहान ९ बजेसम्म करिब २०० ट्रकलाई भारततर्फ पठाइएको प्रहरी उपरीक्षक श्रेष्ठले बताउनुभयो । भारतको विहार राज्यमा चुनाव भइरहेको सन्दर्भमा नेपाल–भारत सीमा नाका बन्द गरिएको बेला रातिको समयमा मितेरी पुलमा थोरै सङ्ख्यामा रहेका मधेसकेन्द्रित दलका कार्यकर्तालाई सुतेको समय पारेर सुरक्षाकर्मीले एकाबिहानै बल प्रयोग गरेर त्यहाँबाट हटाएको थियो ।

प्रहरी उपरीक्षक श्रेष्ठका अनुसार मितेरी पुलमा धर्नामा बसेका आन्दोलनकारीलाई हटाउने क्रममा अटेर गर्ने पाँचजना आन्दोलनकारीलाई प्रहरीले नियन्त्रणमा लिएको र बाँकी आन्दोलनकारी भारततर्फ भागेका हुन् । भारतीय नम्बरका ट्रकलाई वीरगन्जबाट रक्सौलतर्फ पठाइएको भए पनि अहिलेसम्म भारततर्फबाट कुनै पनि ट्रक नेपाल छिर्न नपाएको प्रहरी उपरीक्षक श्रेष्ठले बताए ।

आन्दोलनकारी सुतिरहेका बेला प्रहरीले एक्कासि अत्यधिक बल प्रयोग गरेको र आन्दोलनकारीका ओढ्ने र बिछ्याउने बन्दोबस्तीका सामानमा प्रहरीले आगो लगाउनुका साथै आन्दोलनकारीले प्रयोग गर्दै आएको टेन्ट पनि प्रहरीले लुटेर लगेको संयुक्त लोकतान्त्रिक मधेसी मोर्चाका नेता प्रदीप यादवले बताए ।

आन्दोलनकारी पुनः अहिले मितेरी पुलमा धर्नामा बसेका छन् । गाउँगाउँबाट ठूलो सङ्ख्यामा आएका आन्दोलनकारीले जुलुस प्रदर्शन गर्दै मितेरी पुलमा धर्नामा बसेका छन् । आन्दोलनकारी र प्रहरीबीच झडप हुँदा वीरगन्ज भन्सार नाका र मितेरी पुल क्षेत्र तनावग्रस्त बनेको छ । स्थिति नियन्त्रणमा लिन प्रहरीले केही राउन्ड हवाई फायरसमेत गरेको जनाएको छ ।

प्रतिक्रिया

सम्बन्धित सामाग्री

फेसबुक