शनिबार, असोज १० २०७७ | Sat, September 26, 2020
नेपालको समय: १४:१७ | UK Time: 09:32

म्याग्दीका होटलमा लगानी बढ्यो

वीनेपाली
२०७२ कार्तिक १५ गते ९:२०

बागलुङ, १५ कात्तिक । म्याग्दीको घोरेपानीका होटलमा लगानी बढेको छ ।

पर्यटक आगमन बढेपछि होटल तथा पर्यटन व्यवसायीले लगानी थप गरेका हुन् । घारेपानी होटल व्यवस्थापन समितिका अनुसार यहाँका होटलमा रु ५० करोड भन्दा बढी लगानी छ । पर्यटकको माग र सुविधालाई ध्यानमा राखेर व्यवसायीहरुले होटलको स्तरवृद्धि गर्न थालेका छन् ।

हाल सातवटा होटलका पुराना भवन भत्काएर नयाँ बनाउन सुरु गरीएको छ । उच्चस्तरको सेवा दिने होटलले रु दुई करोड भन्दा माथिको लगानी गरेको समितिका अध्यक्ष जुनु पुनले बताउनुभयो । उहाँ आफैँले पनि रु सवा दुई करोडको लगानीमा होटल निमार्णको काम अघि बढाउनुभएको छ ।

अन्नपूर्ण चक्रिय पदमार्गमा पर्ने घोरपानीमा पर्यटक भित्रने क्रम बढेपछि व्यवसायी उत्साहित बनेका हुन् । “ बर्सेनि पर्यटकको चाप बढ्न थालेको छ,” उहाँले भन्नुभयो–“गुणस्तरीय सेवा दिन होटलहरुले आफूलाई स्तरवृद्धि गरिरहेका छन्, लगानी थपिएको छ ।”

घोरेपानीमा अहिले २२ वटा पर्यटकीय होटल सञ्चालनमा छन् । काठले बनेका पुराना होटलका भवनलाई विस्थापित गरेर नयाँ पक्की संरचना बनाउने क्रम बढेको होटल ‘स्नो भ्यू’ का सञ्चालक टेकसर बुद्धुजा पुनले बताउनुभयो ।

पुरानै खाले संरचनामा पर्यटकीय आकर्षण हुने भए पनि पर्यटकको माग र आवश्यकता अनुसार नयाँ संरचना निर्माण गर्नुपर्ने अवस्था रहेको उहाँको भनाइ छ । ठूलो लगानीमा होटल सञ्चालन गरेका व्यवसायी भूकम्प, नाकाबन्दी, राजनीतिक अस्थिरता जस्ता कारणले निराश छन् ।

गत वर्षको तुलनामा यो वर्षको मुख्य पर्यटकीय याममा पर्यटक आधा घटेको समितिले जनाएको छ । गत वर्ष असोज–मङ्सिरमा दैनिक ४०० जति पर्यटक भित्रने गरेकोमा अहिले १५० देखि २०० आउने गरेको अध्यक्ष पुनले जानकारी दिनुभयो । गत बुधबारसम्म घोरेपानीमा एक हजार ४५५ विदेशी पर्यटक भित्रिएका थिए ।

सूर्योदय र हिमशृङ्खला अवलोकनका लागि पर्यटकहरु यो याममा घोरेपानी र पुनहिल पुग्ने गर्छन् । दुई हजार ८७४ मिटरको उचाइमा रहेको घारेपानी तथा तीन सय २१० मिटरको उचाइमा रहेको पुनहिलबाट धवलागिरि, अन्नपूर्ण र मनास्लु हिमशृङ्खलाका दर्जनाँै हिमाल देख्न सकिन्छ ।

अन्पूर्ण चक्रिय पदमार्ग र धवलागिरि–अन्नपूर्ण पर्यावरणीय पदमार्ग हुँदै पर्यटक घारेपानी–पुनहिल पुग्ने गरेका छन् ।

प्रतिक्रिया

सम्बन्धित सामाग्री

फेसबुक