बुधबार, असोज ७ २०७७ | Wed, September 23, 2020
नेपालको समय: २१:३८ | UK Time: 16:53

उपराष्ट्रपतिमा पूर्व लडाकु कमाण्डर पुन

वीनेपाली
२०७२ कार्तिक १४ गते १३:४६
नवनिर्वाचीत उपराष्ट्रपति नन्दबहादुर पुन अभिवादन गर्दै । तस्बिर ः प्रदीपराज वन्त,रासस

नवनिर्वाचीत उपराष्ट्रपति नन्दबहादुर पुन अभिवादन गर्दै । तस्बिर ः प्रदीपराज वन्त,रासस

काठमाडौँ, सङ्घीय गणतन्त्र नेपालको दोस्रो उपराष्ट्रपतिमा एकीकृत माओवादीका स्थायी समिति सदस्य एवम् पूर्व लडाकु कमाण्डर नन्दबहादुर पुन विजयी भएका छन् ।

व्यवस्थापिका–संसद्, निर्वाचन अधिकृतको कार्यालयमा आज सनिबार भएको मतदानमा पुनले ३२५ मत प्राप्त गरे । उनका निकटतम प्रतिद्वन्द्वी काँग्रेसका उम्मेदवार अमियकुमार यादवले २१२ मत प्राप्त गरे ।

व्यवस्थापिका–संसद्मा हाल ५९७ जना सांसद रहेका छन् । तीमध्ये निर्वाचनमा ५४७ सहभागी भएका थिए । तराई मधेसमा आन्दोलनमा रहेका मधेसवादी दलले भने निर्वाचनमा भाग लिएका थिएनन् । निर्वाचनमा १० मत बदर भएको थियो ।

संसद्को बैठकमा सभामुख ओनसरी घर्तीले उपराष्ट्रपतिमा पुन निर्वाचित भएको घोषणा गरेकी थिइन् । यसअघि निर्वाचन अधिकृत एवम् व्यवस्थापिका–संसद् सचिवालयका महासचिव मनोहरप्रसाद भट्टराईले उपराष्ट्रपतिको मत परिणाम सभामुख घर्तीलाई बुझाएका थिए ।

एमालेका वरिष्ठ नेता झलनाथ खनाल प्रस्तावक र राष्ट्रिय प्रजातन्त्र पार्टी नेपालका प्रमुख सचेतक दिलनाथ गिरी समर्थक रहेका पुन सत्ता गठबन्धनका साझा उम्मेदवारका रुपमा मैदानमा उत्रिएका थिए । पुनले संसद्मा रहेका एमाले, एकीकृत माओवादी, राष्ट्रिय प्रजातन्त्र पार्टी नेपाल, मधेसी जनअधिकार फोरम नेपाल (लोकतान्त्रिक) लगायत १५ दलले समर्थन गरेका थिए ।

तत्कालीन माओवादीले सञ्चालन गरेको दशवर्षे सशस्त्र सङ्घर्षदेखि शान्ति प्रक्रिया र संविधान निर्माणसम्म महत्वपूर्ण योगदान गर्नुभएका एमाओवादी नेता पुन रोल्पाको राङ्सीदेखि बहादुर भवनको यात्रासम्म आइपुगेका हुन। व्यवस्थापिका–संसद्को अर्को बैठक यही कात्तिक २२ गते आइतबार बिहान ११ बजे बस्नेछ ।

यसअघि सभामुख घर्तीले एमालेका तर्फबाट समानुपातिक निर्वाचन प्रणालीमार्फत निर्वाचित भएकी विद्यादेवी भण्डारी राष्ट्रपतिमा विजयी भएकाले सांसदको पद खाली भएको सदनलाई जानकारी गराइन् ।

प्रतिक्रिया

सम्बन्धित सामाग्री

फेसबुक