शोकाकुल परिवार । तस्विरः एपी
मोन्टेरी (मेक्सिको), ५ असार । मेक्सिकोको उत्तरी भागमा शुक्रबार बन्दुकधारीहरूले एक बियर व्यवसायमा आक्रमण गरी दिउसै १० व्यक्तिको हत्या गरेको र केही व्यक्तिलाई नाङ्गो रूपमा छोडेको अधिकारीहरूले जानकारी दिएका छन् । उक्त आक्रमण दुई समूहबीच शत्रुताका कारण भएको देखिएको अधिकारीहरूले बताएका छन् ।
मोन्टेरी औद्योगिक केन्द्रबाहिर अवस्थित गार्सिया नगरपालिकाको एक बियर वितरण केन्द्रमा केही व्यक्तिहरू दुई गाडीमा आई आक्रमण गर्न थालेको सरकारी वकिलहरूले बताएका छन् ।
सरकारी महान्यायाधीवक्ता ह्याभियर फ्लोरेसले यो गोली प्रहार दुई आपराधिक समूहबीच भएको र अनुसन्धान यसैमा आधारित भएको बताउनुभयो । उहाँले घटनास्थलमा सात किलो गाँजा फेला परेको उल्लेख गर्नुभयो ।
सात व्यक्तिको घटनास्थलमै मृत्यु भएको र उनीहरू कोही नाङ्गो वा अर्ध नाङ्गो अवस्थामा फेला परेको उहाँले जानकारी दिनुभयो । अन्य तीन व्यक्तिको अस्पतालमा मृत्यु भएको थियो ।
उहाँले मृतकहरूलाई नै छानेर आक्रमण गरिएको र बियर वितरण केन्द्रका अन्य कर्मचारीहरूलाई छोडिएको बताउनुभयो ।
उहाँले मृतकहरू आपराधिक क्रियाकलापमा संलग्न भएको विषयमा आफू निश्चित नभएको तर उनीहरूमाथि आक्रमण भएको अवस्था हेरी उनीहरू त्यस्तो क्रियाकलापमा संलग्न भएको देखिएको बताउनुभयो ।
सरकारी अनुसन्धानकर्ताहरूले आफ्नो परिचय नदिने सर्तमा जेटाज लागुपदार्थ व्यापारीहरूले आफ्नो व्यापारका लागि उक्त क्षेत्र उपयोग गरेको बताएका छन् ।
प्रहरीले गाँजाका साथमा एक बन्दुक तथा १० वटा गोली फेला पारेका छन् । अर्का अधिकारीले आक्रमणकारीले १० हजार पेसो लुटेर लगेको बताए ।
