कतारका झापालीले भुकम्प पीडितलाई गरे एक करोडको मद्दत

विनाशकारी भूकम्पका कारण पीडित परिवारलाई कतारमा रहेका झापाली युवाहरुको साझा संस्था ‘प्रवासी झापाली सम्पर्क मञ्च’ले १ करोड २ लाख रुपैयाँ भन्दा बढीको राहत सामग्री वितरण गरेको छ ।

कतारमा रहेका झापाली व्यावसायी महेन्द्र चौलागाईंको पहलमा विभिन्न दाता कम्पनीहरुको सहयोगमा उक्त रकम संकलन गरिएको हो । उक्त कोषमा प्रवासी झापाली सम्पर्क मञ्चका पदाधिकारीहरुले पनि सहयोग जम्मा गरेको बताइएको छ ।
मञ्चले गत मे ९ तारिखदेखि भूकम्प प्रभावित जिल्ला काभ्रे, पर्वत, गोरखा, सिन्धुपाल्चोक, दोलखा र मुस्ताङका विकट गाँउमा पुगी राहत सामाग्री वितरण गरेको हो । मञ्चले टिन (जस्तापाता), म्याट्रेस, ब्ल्याङ्केट, त्रिपाल, खाद्यान्न लगायतका सामाग्री वितरण गरेको मञ्चका अध्यक्ष चुडामणि कार्कीले जानकारी दिए ।
मञ्चले काभ्रे जिल्लामा कोसीदेखा र साठीघर गाविसका २ सय २६ परिवार, पर्वतको रानीपानी गाविसका १ सय ५० परिवार, गोरखाको थालाजुङ गाविसका ७५ परिवार, मुस्ताङको ६७ परिवार, दोलखाको जिरी नगरपालिका १ सय परिवार र सिन्धुपाल्चोकको पाङटाङ गाविसका १ सय ५० परिवारलाई राहत सामग्री वितरण गरेको छ । प्रतिपरिवारलाई एक बन्डल टिन, २ थान म्याट्रेक्स, २ थान ब्याङकेट, त्रिपाललगायतको सामाग्री वितरण गरिएको अध्यक्ष कार्कीले अनलाइन वार्तामा बताए ।

राहत वितरणका लागि कतारबाट प्रवासी झापाली सम्पर्क मञ्च कतारका अध्यक्ष चुडामणि कार्कीको नेतृत्वमा संयोजक लेखनाथ खतिवडा, प्रेम बानियाँ, लक्ष्मण खतिवडा, भीमकुमार कट्वाल र प्रवासी झापाली सम्पर्क मञ्च नेपालका अध्यक्ष तथा सभासद प्रेम गिरीको टोली प्रभावित जिल्लामै पुगेर राहत वितरण गरेको थियो । स्थानीय जिल्ला प्रशासन कार्यालयका पदाधिकारीका साथमा विभिन्न जिल्लामा राहत बाँडिएको मञ्चले बताएको छ ।
राहत वितरण कार्य सफल रुपमा सम्पन्न भएको जानकारी दिँदै मञ्चका अध्यक्ष कार्कीले प्रवासमा रहेका झापालीहरुको संस्था भए पनि मुलुकमा महाविपत्ति आइलाग्दा आफूहरु जिल्ला भन्दा माथि उठेर सहायताका लागि जुटेको बताए ।