लन्डन । गैर आवासीय नेपाली संघका अध्यक्ष शेष घले अष्ट्रेलियाका ९९ औं धनी व्यक्ति बनेका छन् । गत वर्ष १ सय ५० औं स्थानमा रहेका घले यस वर्ष ९९ औं सूचीमा आइपुगेका हुन् ।
अष्ट्रेलियाबाट प्रकाशित हुने आर्थिक पत्रिका बिजनेस रिभ्यू विक्लीले शुक्रवार सार्वजनिक गरेको यस वर्षको सूचीमा उनी ५ सय २८ मिलियन डलरसहित ९९ औं धनी भएका हुन् । गत वर्ष ३ सय ३५ मिलियन सम्पत्ति भएका घले दम्पत्तिको सम्पत्ति एक वर्षमा १ सय ९३ मिलियन डलरले वृद्धि भएको छ । यसैगरि गत वर्ष १ सय ५१ औं धनी व्यक्तिको सूचीमा रहेकी उनकी श्रीमती जमुना गुरुङ समेत यस वर्ष एक सयौं धनी व्यक्तिको नम्बरमा परेकी छिन् ।
नयां सूचीमा परेसंगै घलेले यसबाट नेपालमा लगानी गर्न र थप काम गर्न प्रोत्साहन मिलेको प्रतिक्रिया दिएका छन् ।
सन १९९० मा विद्यार्थी भिषामा अष्ट्रेलिया गएका थिए घले । अहिले घलेको रियल स्टेट, मेलबर्न इन्सटिच्युट अफ टेक्नोलोजी लगायत व्यवसायिक क्षेत्रमा लगानी छ । उनको मेलबर्नस्थित उक्त इन्सटिच्युटमा मात्र करिव ३ हजार विद्यार्थी अध्ययनरत छन् ।
