काठमाडौं। शनिबार गएको विनासकारी महाभूकम्प प्रभावितहरुको सहयोगका लागि गैर आवासीय नेपाल संघ (एनआरएनए) ले अफ्रिकाको विभिन्न देशबाट ३० लाख रुपैया संकलन गरेको छ। त्यसमा पूर्वी अफ्रिकी मुलुक तान्जानियाको एनआरएनएले भुकम्प पीडितका लागि १४ लाख रुपैया संकलन गरेको छ। 
‘पचास जना भन्दा कम नेपाली बसोबास गर्ने अफ्रिकी मुलुक तान्जानियाबाट यति ठुलो सहयोग स्वदेशका पीडितहरुको सहयोगका लागि पठाउनु सिंगो एनआरएनए अभियानलाई गौरबको बिषय भएको छ’ एनआरएनए अफ्रिका संयोजक हिक्मत थापाले बताएका छन्। एनआरएनए तान्जानियाका महासचिब सर्बेश जोशीका अनुसार उक्त रकम हिजै एनआरएनएको काठमाडौँ स्थित राहत कोष खातामा जम्मा भैसकेको छ।
त्यसै गरि अफ्रिकाका अन्य एनआरएनए शाखाहरुले पनि राहत संकलन जारी राखेका छन्। मंगलबारसम्म नाइजेरियाले ७ लाख, केन्याले ६ लाख , घानाले १ लाख संकलन गरेको छ। युगान्डा र जाम्बियामा पनि सहयोग संकलन सुरु भएको छ।
