काठमाडौं। धादिङको पिडा ८ मा विषाक्त गहूँको रोटी खाँदा एकै परिवारका ६ जनाको मृत्यु भएको छ। विषादी मिसिएको गहुँ पानीमा पखालेर घट्टमा पिसेको पिठोबाट बनाइएको रोटी खाँदा पिडा गाउँका ६२ वर्षीय सन्जबहादुर स्याङ्तान, उनकी बुहारी २८ वर्षीया फुलमाया स्याङ्तान्, नाति नातिनाहरु ७ वर्षीया सविता स्याङताङ, ५ वर्षका रमेश, अर्जुन र २ वर्षका अनिल स्याङ्तानको मृत्यु भएको हो। वीउका लागि किराले नखाओस् भनेर विषादी हालेर राखेको गहुँको परिकार खाँदा यस्तो भएको प्रहरीले जनाएको छ। 
कतिपयको अवस्था चिन्ताजनक छ । घाइते ठुलीमाया तामाङ, मगमाया तामाङ, दिलवहादुर तामाङ, शान्ति तामाङ, सुनमाया तामाङ, राजु तामाङ, रमिला तामाङ , टेक तामाङ, पुर्ण तामाङ, वुद्धलक्ष्मी तामाङलाई मनमोहन मेमोरियल अस्पताल र लक्ष्मी तामाङ, वुद्धसिंह तामाङ, सम्झना तामाङ, फुलमाया तामाङलाई उपचारका लागि राजधानीको वल्खुस्थित शिवज्योती अस्पताल पुर्याइएको छ।
