लन्डन । लन्डनमा गोर्खा नेपाली समुदायलाई पहिलो पटक छुट्याइएको बेग्लै समाधिस्थलको औपचारिक उद्घाटन भएको छ । लन्डनस्थित हिलिङ्डन वरो काउन्सिलले गोर्खा नेपाली समुदायका लागि दिएको समाधिस्थलको मंगलवार बिहान एक औपचारिक कार्यक्रमबीच उद्घाटन गरिएको हो । लन्डनस्थित हिलिङ्डन वरो काउन्सिल मेयर क्याथरिन डानले नेपाली झण्डा र हिलिङ्डन गोर्खा नेपलिज कम्युनिटीका अध्यक्ष सूर्य इम्सङ लिम्बुले बेलायती झण्डा खोलेर समाधिस्थल
उद्घाटन गरे । उक्त नेपाली कम्युनिटीकै पहलमा समाधिस्थल मिलेको थियो ।
वेष्ट ड्रेटनस्थित चेरी लेन सिमेट्री नजिक पिस मेमोरियल गार्डेनमा अवस्थित उक्त समाधिस्थलमा करिब ५ लाख रुपैयां खर्चमा ठूलो साइन पोष्ट राखिएको छ ।
समाधिस्थल २० वर्षका लागि छुट्याइएको हो । काउन्सिलले त्यहां अस्तु राख्ने ठाउं समेत बनाइदिएको छ । लन्डनका ३३ बरोमध्ये नेपालीलाई बेग्लै समाधिस्थल दिनेमा हिलिङ्डन वरो काउन्सिल पहिलो हो । कम्युनिटीका सचिव तेज पुनमगरका अनुसार, काउन्सिलले गोर्खाहरुको योगदान स्मरण गर्ने यो सानो उदाहारण भएको निष्कर्षसहित अरु काउन्सिललाई पनि यस्तो कार्य गर्न प्रेरित गरेको छ ।
मन्तव्यका क्रममा हिलिङ्डन वरो काउन्सिल मेयर डानले गोर्खाहरुको योगदानको कदर गर्दै बेग्लै समाधिस्थल दिन पाउनु आफूहरुका लागि गर्वको विषय भएको बताइन् । उनले भर्खर प्रथम विश्वयुद्धको एक सय वर्ष मनाइएको र आगामी वर्ष बेलायत नेपाल कुटनीतिक सम्वन्ध स्थापनाको दुई सय वर्ष गांठ बनाउन लागिएको सन्दर्भ जोड्दै समाधिस्थल उद्घाटन कार्यक्रम पनि त्यस्तै ऐतिहासिक भएको जनाइन् ।
हिलिङ्डन गोर्खा नेपलिज कम्युनिटीका अध्यक्ष सूर्य इम्सङ लिम्बुले गोर्खाहरुले विगत २०० वर्ष देखि बेलायती साम्राज्यका लागि लड्दै आएपनि अरु समुदाय जस्तो बेग्लै समाधिस्थल आफूहरुको नभएको गुनासो हिलिङ्डन काउन्सिलसमक्ष राखेको र सन् २०१२ देखिको पहल स्वरुप अहिले समाधिस्थल पाएको उल्लेख गरे । उनी काउन्सिलप्रति आभारी थिए । मन्तव्यका क्रममा स्थानीय सांसद, काउन्सिलर र अन्य अतिथीहरुले गोर्खा इतिहास केलाउंदै उनीहरुको योगदान स्मरण गरेका थिए ।
मन्तव्यपछि विगुलरले आर्मीमा बजाइने लाष्ट पोष्ट नामको विगुल धुन र पाइपरले ल्यामेन्ट फ्लावर अफ दि फरेष्ट शोक धुन बजाएका थिए । यस क्रममा वातावरण शान्त देखिन्थ्यो । पछि फेरि विगुलरले रिभाली धुन बजाएर शान्त माहौल तताएका थिए ।
एक घण्टा लामो औपचारिक कार्यक्रममा हिलिङ्डन गोर्खा नेपलिज कम्युनिटीले मेयरसहित चारजना अतिथीहरुलाई कोठीमारा खुकुरी उपहार स्वरुप प्रदान गर्यो । कम्युनिटी अध्यक्ष लिम्बुले उपहार दिएका हुन् । औपचारिक कार्यक्रम समापनपछि हिलिङ्डन गोर्खा नेपलिज कम्युनिटीले दिवाभोज सहित नेपाली गीतसंगीत प्रस्तुत गरेको थियो ।
