नक्कली डिभीएलएको इमेलमा फस्नुहोला!

लण्डन । बेलायतको सवारी चालक अनुमति तथा सवारीसाधनको लाइसेन्स दिने निकाय ड्राइभर तथा भेइकल लाइसेन्स एजेन्सी (डिभीएलए) ले भ्रामक इमेलबाट सचेत रहन सवारी धनी र सवारी चालकहरुलाई अपील गरेको छ ।
डिभीएलएले एक सूचना जारी गरी ठगहरुले डिभीएलएबाट पठाएको भनी इमेल पठाउने गरेको र सो इमेलमा दिइएको लिंकमा गई व्यक्तिगत विवरणहरु भर्न लगाइने गरेकोप्रति ध्यानाकर्षण भएको जनाएको छ ।

डिभीएलएले आफूले त्यस्तो कुनै इमेल नपठाएको र आफ्ना ग्राहकहरुसित त्यस्ता महत्वपूर्ण व्यक्तिगत सूचनाहरु नमागेको स्पष्ट गरेको छ ।

त्यस्तो कार्य ठगहरुको भएको प्रष्ट्याउंदै डिभीएलएले त्यस्ता इमेल आएको खण्डमा त्यसउपर कुनै कारबाही नगर्न र दिइएको लिंकमा कुनै विवरण नभर्न आफ्ना ग्राहकहरुलाई अनुरोध गरेको छ ।

दिसइज मनी डटकमका अनुसार डिभीएलएबाट पठाइएको भनिएका त्यस किसिमका इमेलमा दिइएको लिंकमा क्लीक गर्न भनिएको हुन्छ ।त्यसमा गएपछि व्यक्तिगत विवरणहरु भर्ने फाराम आउँछ ।

ठगहरुले सो फारामबाट व्यक्तिगत विवरणहरु बटुली सर्वसाधारणको बैँक खाताबाट पैसा लिन प्रयोग गर्नसक्ने बताइएको छ ।

डिभीएलएले सरकारी डिजिटल सर्भिसले सो बारेमा अनुसन्धान गरिरहेको बताएको छ ।सर्वसाधारणलाई गलत सूचना दिइरहेको र गैरकानुनी कार्य गरेकोबारे तत्काल कार्यबाही गर्ने पनि जनाइएको छ ।

डिभीएलएले गत अक्टोबर १ बाट सवारी कर पूर्णरुपमा अनलाइनमा लाने बित्तिकै ठगहरुले यस्तो मौका छोपेका हुन् ।
डिभीएलएले जीओभीडटयुके मार्फत सवारी अनुमति पत्र र सवारी करका बारेमा कारोबार गर्न सुझाव दिएको छ ।