पुरस्कार ग्रहण गर्दै शर्मा बांया
लन्डन । नर्थ योक्सायरस्थित कलवर्न टाउन काउन्सिल उपमेयर डा. जगन्नाथ शर्माले बेलायतको रक्षा मन्त्रालय (एमओडि) मेडिकल सर्भिसेस्मा उत्कृष्ट अनुसन्धाताको पुरस्कार पाएका छन् । एक दशकदेखि एमओडिसंग आवद्ध उपमेयर शर्माको मस्कुलो स्केलेटल इन्जुरी विषयमा केन्द्रित रहेर गरेको अनुसन्धानले पुरस्कार प्राप्त गरेको हो । एमओडिको सुपरिटेन्डेन्ड अफ फिजिओथेरापी शर्मा इन्फेन्ट्री ट्रेनिंग सेन्टर क्याट्रिकमा कार्यरत छन् ।
मंगलबार रोयल जिओग्राफिकल सोसाइटी लन्डनमा आयोजित डिफेन्स् मेडिकल कन्फरेन्स्मा शर्मा पुरस्कृत भए । गोल्ड मेडलसहित नगद पांचसय पाउण्ड प्राप्त गरेपछि वीनेपालीसंग खुशी सांट्दै शर्माले यसलाई आफ्नो करिअरकै उपलव्धिका रुपमा लिएको बताए ।
ब्रिटिश आर्मीमा तनाव (स्ट्रेस् फ्याक्टर) र बोन इन्जुरीका कारण वृद्धि भइरहेको मेडिकल डिस्चार्ज क्रम घटाउन चिन्तित एमओडिले यसको अनुसन्धानमा १८ मिलिअन पाउण्ड खर्च गरेको छ । शर्माको रिसर्च तिनै समस्या न्यूनीकरणका उपाय खोजी गर्न उत्कृष्ट ठहरिएको हो ।
