म्याग्दी । बेनीका एक किसानले पालेको एउटा गाईले नब्याउँदै दैनिक पाँच लिटर दूध दिने गरेको छ ।
मल्लाज माझफाँट-३ वारी बेनीका किसान अम्बिका र खेमबहादुर गुरुङले पालेको साढे दुई वर्षको जर्सी गाईले नब्याउँदै दूध दिएको हो ।
गत वैशाख १९ गते दुई वर्ष उमेर पुगेको सो गाई एकपटक पनि ब्याएको छैन ।
तर गाईले जेठको १४ गतेदेखि नियमित दूध दिइरहेको कृषक अम्बिका गुरुङले जानकारी दिए । गुरुङका अनुसार २०७० माघ ५ गते कृत्रिम गर्भाधान गराइएको सो गाई यही कात्तिकमा ब्याउने आशा गरिएको छ ।
शरुमा दैनिक सात लिटर दूध दिएको उक्त गाईले गर्भमा रहेको बाच्छो बढ्दै जाँदा अहिले दैनिक पाँच लिटरका दरले दूध दिइरहेको छ । पहिलो बेत पनि नब्याउँदै कल्चौरा बढेर थुन पग्रिएपछि दुहुन थालेका हौँ-कृषक खेमबहादुरले भने-यसअघि नब्याइकन गाईले दूध दिएको सुनेको पनि थिइनँ ।
जिल्ला पशु सेवा कार्यालयका पशु स्वास्थ्य प्राविधिक सुवास रेग्मीले अपवादका रूपमा यस्तो हुने गरेको भन्दै पछि उत्पादन हुनुपर्ने हर्मोन अघि नै उत्पादन भएकाले गाईले नब्याए पनि दूध दिएको बताए ।
