लन्डन । अन्तर्राष्ट्रिय नेपाली वाङ्मय प्रतिष्ठान (अनेवा), बेलायतले हालै साहित्यकार वीपी कोइरालाको १०० औं जन्मजयन्ती तथा नेपाली साहित्य र आख्यान विषयक एक साहित्यिक कार्यक्रम गरेको छ ।
संस्थाका अध्यक्ष विकलचन्द्र आचार्यको सभापतित्वमा कार्यक्रम भएको हो । उक्त अवसरमा नेपालबाट आएका विशेष अतिथि नेपाली साहित्यकार तथा संस्कृतिविद् प्राध्यापक तुलसी दिवसले प्रवासमा नेपाली साहित्य र संस्कृतिको जगेर्ना गर्न यस्ता कार्यक्रमले महत्वपूर्ण भूमिका निर्वाह गर्ने बताए । उनले अहिलेको युगमा नेपाली साहित्य र संस्कृति बचाउन स्वदेश तथा विदेश रहेका युवा साहित्यकारहरुले आ–आफ्नो ठाउंबाट पहल गर्नुपर्नेमा समेत जोड दिए । भाषा, साहित्यको कुनै सिमाना नहुने उल्लेख गर्दै साहित्यकार दिवसले साहित्य र संस्कृतिले नै नेपालको परिचय जोगाएर राखेको बताए ।
कवि तथा महाकाव्यकार नरेन्द्र परासरले आफ्ना रचना वाचन गर्दै साहित्यमा वीपी कोइरालाको स्थान अग्रणी रहेको स्मरण गरे । उता, कोइरालाको आत्मवृत्तान्तलाई नेपालको पहिलो अडियो पुस्तकका रुपमा प्रकाशित गर्न पाएकामा नेपाली साहित्य विकास परिषद बेलायतका अध्यक्ष खगेन्द्र नेपालीले प्रसन्नता व्यक्त गरे ।
कार्यक्रममा समाजसेवी दीक्षा चापागाईंलाई रु. बीस हजार राशीको अनेवा बमबहादुर केसी पुरस्कार प्रदान गरियो ।
प्रतिष्ठानका उपाध्यक्ष गोपीकृष्ण प्रसाईंले सञ्चालन गरेको सो कार्यक्रममा महासचिव जयालक्ष्मी राई, कार्यवाहक राजदूत तेजबहादुर क्षेत्री लगायतले मन्तव्य दिएका थिए । उक्त अवसरमा समाजसेवी रामचन्द्र आचार्य, बीबीसी नेपाली सेवाका सुमन खरेल, गायिका सितु खरेल, गोर्खाली समाजका अध्यक्ष भरत क्षेत्री, नेपाली जनसम्पर्क समिति, बेलायत आवद्ध विज्ञान प्रसाईं, डम्बर गिरी लगायतको उपस्थिति थियो ।
