आइतबार, असोज ११ २०७७ | Sun, September 27, 2020
नेपालको समय: ०२:२८ | UK Time: 21:43

इजरायलमा गोलाबारीबाट बच्नलाई १६ देखि ९० सेकेण्ड

वीनेपाली
२०७१ साउन १० गते ९:२३

इजरायल । तीनजना इजरायली किशोरको अपहरण र हत्या गरिएपछि शुरु भएको इजरायल–हमास बीचको तनावले इजरायलमा कार्यरत नेपालीहरुलाई पनि निक्कै चिन्तित तुल्याएको छ । 
इजरायल र हमासबीच यस किसिमको रकेट लेनदेन नयाँ नभए पनि यसपटक हमाससित बढी क्षमताका रकेटहरु भएकाले यहाँका नेपालीहरु मात्र होइनन् इजरायलीहरु पनि बढी चिन्तित छन् । केही महिनादेखि तेलअभिभमा बस्दै आएका पत्रकार करुण अर्यालको इजरायल अनुभव उनकै शब्दमा ।

 

209861_1878320832481_6674481_o

तीनजना इजराइली किशोरको शव भेटिएकै दिनदेखि इजराइलले उनीहरुको हत्यामा हमासको संलग्नता रहेको निस्कर्ष निकाल्दै हवाई आक्रमण शुरु गर्यो । सो हत्यामा आप्mनो संग्लनता हमासले अस्वीकार गरेको छ । इजरायली आक्रमणको जवाफमा हमासले पनि इजरायली क्षेत्रमा रकेट हान्न शुरु ग¥यो । आज (आइतबार) छ दिन भइसक्यो । साइरन नबजेको दिन नै छैन । इजराइलले रकेटलाई बस्ती बसेको क्षेत्रमा पड्कन नदिन आइरन डोमको व्यवस्था गरेकोले अहिलेसम्म इजरायलतर्फ हताहति हुन पाएको छैन । डोमले रकेटलाई समातेर बस्ती नबसेको क्षेत्र वा मानिसको चहलपहल नभएको समुद्रमा लगेर विष्फोट गराउने पर्छ ।
साइरन बजेपछि तेलअभिभमा बंकरभित्र लुक्नका लागि ९० सेकेण्डको समय हुन्छ भने अन्य ठाउँमा १६ सेकेण्डभित्र लुकिसक्नुपर्छ । यसअघि हमासले तेलअभिभसम्म रकेट हानेका थिएनन् । अहिले उनीहरुसित बढी क्षमताका रकेट भएको पुष्टि भएको छ । त्यसले सबैलाई केही चिन्तित बनाएको छ । हामीलाई यस्तो अनुभव नभएपनि यहाँका स्थानीय बासिन्दालाई भने सामान्य झैँ लागेको देखिन्छ । बसहरु चलेकै छन् । पसलहरु खुलेकै छन् । म पनि सुपरस्टोरमा श्रीमती र छोरासहित किनमेल गर्न गएको बखतमै साइरन बज्यो । हतारहतार बंकरमा पस्यौँ । सुपरस्टोर, अपार्टमेण्ट, पार्क, सबैतिर बंकर हुन्छ । फलामै ढोका, फलामकै झ्याल भएको हुन्छ बंकर । बंकर पनि धेरै किसिमको हुन्छ । बस चल्दाचल्दै साइरन बज्यो भने बस रोकेर सुरक्षित ठाउँमा जानुपर्छ । गाडी चलाउँदा चलाउँदै साइरन बज्यो भने गाडी रोकेर बंकरतिर जानुपर्छ । बंकरमा जान सकिएन भने घरमै भ¥याङमुनी बस्ने गरिन्छ ।
नेपालीहरु प्रायः केयररको रुपमा काम गर्ने गर्छन् । यस्ता केयररहरुको दायित्य हुन्छ आफ्ना बलाबाइत (मालिक) को सुरक्षा गर्नु । यदि केयररले बलाबाइतको सुरक्षा गर्न सकेन भने उनीहरुलाई हत्याको आरोप पनि लाग्न सक्छ । नेपालीहरु खासै असुरक्षित छैन । धेरैजसो नेपालीहरु तख्ना मर्खाजीत क्षेत्रमा बस्छन् । त्यो क्षेत्र त्यस्तो जोखिमयुक्त छैन । केही नेपालीहरु त यस्तो गोलाबारुदको बाबजूद समुद्री तटमा बीबीक्यु गर्न पनि गएको देखेको छु । ‘मर्न त जहाँ पनि मरिन्छ’ भन्दै केही साथीहरुले मलाई पनि बोलाएका थिए । तर दिनचर्या भने प्रभावित भएको छ । म पहिले छोरा लिएर घुम्न निस्कने गर्थेँ । अहिले त्यो बन्द भएको छ ।
अहिलेसम्म इजरायलले करिब एक हजार, हमासले करिब ५०० रकेट प्रहार गरिसकेका छन् । यहाँका स्थानीय सञ्चारमाध्यमका अनुसार प्यालेष्टाइन अधीनस्थ गाजा क्षेत्रमा १६७ जनाको मृत्यु र हजारौँ घाइते भइसकेका छन् तर इजरायलतर्फ एक जनाको ज्यान गएको सुन्नमा आएको छ । बोर्डर क्षेत्रमा बसोबास गर्ने झापा बाहुनडाँगीकी पिंकी प्रधान चौबीसै घण्टा पड्किएको मात्र सुनियो भनेर तेलअभिभमा एक साताको बिदा मनाउन आएकी छिन् । यहाँस्थित नेपाली दूताबासले पनि नेपालीहरुलाई सुरक्षित रहन अपील गरेको छ ।
करिब छ हजार नेपाली इजरायलमा बसोबासरत छन् । इजरायलको आइरन डोमले अहिलेसम्म त सबैको सुरक्षा गरिरहेकै छ तर एकैचोटी धेरैवटा रकेट हानियो भने डोमले पनि काम गर्न सक्दैन भनिन्छ । उता हमासले भने हामी एकै चोटी ८० वटा रकेट हान्छौँ भनेर धम्की दिइरहेको पनि सुनिन्छ । तथापि इजरायलमा काम गर्नु इराक, अफगानिस्तान जस्तो जोखिमपूर्ण छैन ।
सन् २०१२ को नोभेम्बरमा युद्धविराम भएपछिको यो यति लामो द्वन्द्व हो । यतिखेर सबैलाई कहिले गोलाबारी बन्द होला भन्ने मात्र चिन्ता छ । अब संयुक्त राष्ट्रसंघ, युरोपियन युनियन लगायत सबैको ध्यानाकृष्ट भएकोले छिट्टै युद्धविराम होला भन्ने आशा छ ।

प्रतिक्रिया

सम्बन्धित सामाग्री

फेसबुक