प्रचण्डलाई दुई सांसदबाहेक सबैको समर्थन

काठमाडौँ । संसदमा ३२ जना सांसद मात्र भएको पार्टी नेकपा माओवादी केन्द्रका अध्यक्ष प्रधानमन्त्री पुष्पकमल दाहाल ‘प्रचण्ड’ले प्रतिनिधिसभामा प्रचण्ड मत पाएका छन् ।
प्रतिनिधिसभाको आजको बैठकमा विश्वासको मतका लागि भएको मतदानमा प्रचण्डलाई नेपाल मजदुर किसान पार्टी र राष्ट्रिय जनमोर्चा नेपालका सांसदहरूले मत्र विपक्षमा मत दिए । प्रचण्डले २७० सांसद उपस्थित बैठकमा दुई तिहाइ बढी मत पाए । उनको पक्षमा दुई सय ६८ मत परेको थियो ।
बैठकमा तीन सांसद अनुपस्थित थिए । जसमा अम्बिका बस्नेत, किशोरसिंह राठौर र मनोरमा शेरचन थिए । यस्तै सभाका ज्येष्ठ सदस्य जबरा सभा सञ्चालनमा भएकाले मत दिन मिलेन भने फौजदारी अभियोग लागेका सांसद टेकबहादुर गुरुङ सभामा प्रवेश पाएनन् ।
राष्ट्रपति विद्यादेवी भण्डारीले नेकपा (माओवादी केन्द्र)का अध्यक्ष दाहाललाई यही पुस १० गते प्रधानमन्त्रीमा नियुक्त गरेकी थिइन् ।
दाहालले नेपालको संविधानको धारा ७६ को उपधारा (४) बमोजिम प्रतिनिधिसभाबाट विश्वासको मत लिएका हुन् । धारा ७६ उपधारा (२) अनुसार नियुक्त प्रधानमन्त्रीले उपधारा (४) बमोजिम त्यसरी नियुक्त भएको एक महिनाभित्र प्रतिनिधिसभाबाट विश्वासको मत लिनुपर्नेछ ।
दाहाललाई नेपाली कांगेस, नेकपा (एमाले), माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी नेपाल, लोकतान्त्रिक समाजवादी पार्टी, नेकपा (एकीकृत समाजवादी), नागरिक उन्मुक्ति पार्टी, जनमत पार्टी र केही स्वतन्त्र सांसदले विश्वासको मत दिएका छन् ।