युएस बंगलाको विमान दुर्घटनामा ४९ जनाको मृत्यु, २१ घाइते

काठमाडौं-त्रिभुवन अन्तर्राष्ट्रिय विमानस्थलमा भएको युएस बंगलाको जहाज दुर्घटनामा ४९ जनाको मृत्यु भएको प्रहरीले पुष्टि गरेको छ । सोमबार अपरान्ह ढाकाबाट काठमाडौंका लागि उडेको जहाज अवतरणका क्रममा त्रिभुवन विमानस्थलमा दुर्घटना भएको थियो ।

काठमाडौं प्रहरी परिसरका प्रमुख विश्वराज पोखरेलले ४९ जनाको मृत्यु भएको पुष्टि गरे । उनले थप २१ जना घाइतेको राजधानीको विभिन्न अस्पतालमा उपचार भइरहेको बताए ।

घाइते मध्ये एक जना अहिले पनि भेटिएका छैनन् । चार चालक दलका सदस्यसहित ६७ यात्रु सवार थिए । जसमध्ये यात्रुमध्ये ३३ जना नेपाली रहेका थिए । यस्तै, अन्य बंगलादेशी र केही विदेशी यात्रु पनि विमानमा रहेको बताइएको छ ।

ढाकाबाट काठमाडौँ आएको बिएस २११ ‘कल साइन’ को उक्त विमान त्रिभुवन अन्तर्राष्ट्रिय विमानस्थलमा अवतरणको क्रममा अनियन्त्रित भई धावनमार्गको पूर्वतर्फ दुर्घटनाग्रस्त भएको हो ।