एमाले भन्छ, ‘पार्टी एकता फागुनभित्रै’

काठमाडौँ- नेकपा एमालेले माओवादी केन्द्रसँग फागुनभित्रै पार्टी एकता गर्ने निर्णय गरेको छ । आइतबारको स्थायी कमिटी बैठकले माओवादी केन्द्रसंगको पार्टी एकता फागुनभित्रै टुङ्ग्याउने विषयमा छलफल गरेको हो ।

पार्टी कार्यालय, धुम्बाराहीमा पार्टी अध्यक्ष केपी शर्मा ओलीको अध्यक्षतामा बसेको बैठकमा नयाँ सरकार गठनसँगै माओवादी केन्द्रसँग आगामी फागुनभित्र नै एकता गर्ने विषयमा छलफल भएको पार्टीका सचिव प्रदीप ज्ञवालीले जानकारी दिए ।

बैठकले सरकारले कुनै परामर्श नै नगरी एकलौटी ढंगले राष्ट्रियसभामा तीन सदस्य सिफारिश गरेकोप्रति आपत्ति प्रकट गर्दै विरोध गरेको छ ।

एमालेले सरकारले बिना परामर्श नेपाली काँग्रेस पार्टी कार्यालयका मुख्यसचिव कृष्णप्रसाद पौडेल, महिला अधिकारकर्मी चाँदनी शाह र काँग्रेसका नेता गोपाल बस्नेतलाई राष्ट्रियसभामा सदस्य बनाउन गरेको सिफारिशको विरोध गरेको हो ।