ब्याडमिन्टन विश्व च्याम्पियनसिपमा निर्णायक बने नेपाली

लन्डन । बेलायतको स्कटल्याण्ड राज्य अन्तर्गत ग्लास्गोमा २१ देखि २७ अगष्टसम्म ब्याडमिन्टन विश्व च्याम्पियनसिप ०१७ आयोजना गरियो । ब्याडमिन्टन वल्ड फेडेरेससनले उक्त प्रतियोगिता गरेको हो ।

उक्त च्याम्पियनसीपमा नेपाली खेलाडी त सहभागी हुन पाएनन् तर लाइन जज (निर्णायक) भने नेपाली थिए जो आकर्षणको केन्द्रमा रहे । नेपाल ब्याडमिन्टन संघका केन्द्रिय सदस्य र काठमाण्डौं ब्याडमिन्टन संघका अध्यक्ष दीपक थापा एसियाबाट आएका तीन लाइन जजमध्ये एक थिए । विश्वका ४० देशका खेलाडी सहभागी उक्त च्याम्पियनसीपमा नेपाली खेलाडी नपरेपनि अफिसियलका रुपमा भने नेपाल देशलाई चिनाएको थापाले बताए । ‘देशको नाम चिनाउनुका अलवा खेल व्यवस्थापन र इभेन्ट आयोजनाबारे धेरै नयां अनुभव ग्रहण गरेको छु’, थापाले लन्डन फर्किएर भने, ‘यहां सिकेको ज्ञान र अनुभव नेपालमा लगेर कार्यान्वयन गर्न पहल गर्नेछु ।’

रियो ओलम्पिक ०१६ मा सहभागी हुने पहिलो नेपाली निर्णायक थिए थापा । नेपालले ब्याडमिन्टन खेलमा दक्षिण एसियामा तेश्रो स्थान ओगटेको बताउंदै थापाले यस खेलमा प्रगति गरिरहेको जनाए । ‘हाम्रो खेल अवस्था 
सुधारोन्मुख छ, राज्यबाट उचित वातावरण र हौसला भए भविष्यमा नेपालले पनि विश्व च्याम्पियनसीपमा सहभागिता जनाउन सक्ने सम्भावना नभएको होइन्’, उनले भने ।

सन् १९७७ मा स्वीडेनको माल्मोमा पहिलो ब्याडमिन्टन विश्व च्याम्पियनसीप आयोजना गरिएको थियो । सन् १९८३ सम्म उक्त प्रतियोगिता प्रत्येक तीन वर्षमा गर्न थालियो भने त्यसपछि सन् २००३ सम्म प्रत्येक दुई वर्षमा । सन् २००५ देखि यस प्रतियोगिता वर्षेनी हुन थालेको छ ।

यसैबीच, थापाको सम्मानमा लन्डन साउथ हयारोस्थित माया पबमा बिहीबार एक कार्यक्रम गरिने भएको छ । पबका सञ्चालक सिद्धार्थ विक्रम क्षेत्रीले खेलाडी र अफिसियलको हौसलाका लागि सम्मान गर्न लागिएको बताए । यसअघि पांच पटकका राष्ट्रिय च्याम्पियन म्याराथन धावक भूमिराज राई र अफिसियलको पनि क्षेत्री लगायत समूहले सम्मान गरेको थियो । इकान्तिपुर