माल्भिकाको दोश्रो बेलायत भ्रमण मिस यूके नेपाल प्रतियोगीलाई प्रशिक्षण दिन

लन्डन । पूर्व मिस नेपाल एवं मिडिया पर्सनालिटी माल्भिका सुब्बा दोश्रो पटक बेलायत आएकी छन् । तर, यसपटक अलिक भिन्न जिम्मेवारी लिएर । ७ वर्षअघि निजी भ्रमणमा आउंदा जति रमाइलो थियो, यसपाली दायित्व बढि छ । आगामी १० सेप्टेम्बरमा हुन लागेको मिस यूके नेपालका प्रतिष्पर्धीहरुलाई प्रशिक्षण दिन उनी लन्डन उत्रिएकी हुन् । अल्डरसटमा हुने अन्तिम प्रतिष्पर्धाका लागि ८ सुन्दरी मैदानमा छन् । इभेन्टस एण्ड आइडियाजले मिस यूके नेपाल प्रतियोगिता ०१७ गर्न लागेको हो ।

मिस नेपाल यूएस, मिस्टर एण्ड मिस नेपाल अष्ट्रेलिया र मिस हङ्गकङ्ग नेपालपछि चौंथो देशका रुपमा बेलायत आएकी माल्भिका यसपटक बढि उत्साहित छन् ।

‘आफूले सिकेको कुरा प्रतिष्पर्धीलाई सिकाउने नै मुख्य उद्देश्य छ’, माल्भिकाले भनिन्, ‘वौद्धिक स्तर बढाउने, व्यक्तित्व विकास र उहांहरुले समाजमा कसरी दायित्व पुरा गर्न सक्नुहुन्छ भन्नेतर्फ ध्यान दिन्छु ।’

करिब डेढ लाख नेपाली बसोवास गर्ने बेलायतको नेपाली डायस्पोरा ‘भाइब्रेन्ट’ छ । त्यसकारण विजेतालाई गहन दायित्व हुने माल्भिकाको बुझाइ छ ।

प्रतियोगितामा राम्री देखिनु नदेखिनु भन्दा पनि यस्ता प्रतियोगिताले समाजसेवामा जान प्रेरित गर्ने माल्भिका बताउंछिन् । ब्युटी पेजेन्टले विदेशको नयां पुस्ता समुदायसंग टाढिइरहेका बेला समुदायसंग नजिक बनाउने र नेपाललाई पनि केही गर्ने अवसर प्रदान गर्ने सुब्बाको बुझाइ छ ।

१२ सेप्टेम्बर नेपाल फर्कनुअघि समयले साथ दिए लन्डनतिर घुम्ने योजनामा छन् उनी ।

तस्विरः शिव भण्डारी