‘तनाव घटाउन योग र ध्यान’

लण्डन । काठमाडौं नागार्जुन हिल्सस्थित ओशो तपोवनका ध्यान प्रशिक्षक स्वामी आनन्द अर्हतले आधुनिक जीवन शैलीले मानिसमा तनाव बढाएको भन्दै खाने कुरा र काम गर्ने शैलीलाई व्यवस्थित गरेर तनाव घटाउन सकिने बताएका छन् ।
एबरडिनमा नेप्लिज हिमालयन एसोसिएसन स्कटल्याण्डद्वारा गत सप्ताहन्त आयोजित सत्संगमा बोल्दै स्वामी अर्हतले योग र ध्यानको नियमित अभ्यासबाट जीवनलाई सुखी र आनन्दित तुल्याउन सबैलाई आग्रह गरे ।

खासगरी पश्चिमा मुलुकहरुमा जीवन सहज रहेको तर नयाँ प्रविधिले मानिसलाई दास बनाउँदै लगेको उनको धारणा थियो । खासगरी किशोरकिशोरीहरुमा स्मार्ट फोनको लत बढेको र यसले गर्दा उनीहरुको निद्रा र पढाइमा समेत असर परिरहेको भन्दै उनले यस्ता समस्याहरुसंग जुध्न पश्चिमा विद्यालयहरुमा पनि अहिले बालबालिकालाई ध्यान र योग सिकाउन थालिएको जानकारी दिए ।

शिविरको दोश्रो दिन २९ जनवरीका दिन युनिभर्सिटी अफ एबरडिनको सभाकक्षमा आयोजित कार्यक्रममा स्वामी अर्हतले ध्यान तथा योगका दुई दर्जनभन्दा बढी विधि सिकाएका थिए । झण्डै चार घन्टा चलेको उक्त कार्यक्रममा उनले स्वस्थ शरीरका साथै मन स्वस्थ राख्‍न ध्यान अनिवार्य भएको बताए ।

कार्यक्रममा नेप्लिज हिमालयन एसोसिएसन स्कटल्याण्डका अध्यक्ष टक थापाले स्वामी अर्हत तथा सबै सहभागीहरुलाई धन्यवाद दिएका थिए ।

यसअघि स्वामी अर्हतले फार्नबरो, डार्टफोर्ड लगायतका स्थानहरुमा एक दिवसीय ध्यान तथा योग कक्षा सन्चालन गर्नुका साथै लण्डनस्थित बीबीसीको मुख्यालयमा सुखी र स्वस्थ जीवन जीउने तरिकाकाबारे व्याख्यान पनि दिएका थिए ।