भ्रमणको पहिलो दिन भारतीय राष्ट्रपति छलफलमै व्यस्त

काठमाडौँ, १७ कात्तिक । नेपालको राजकीय भ्रमणमा रहनुभएका भारतका राष्ट्रपति प्रणव मुखर्जीको पहिलो दिन निकै व्यस्त रह्यो ।

राष्ट्रपति विद्यादेवी भण्डारीको मैत्रीपूर्ण निमन्त्रणामा नेपालको तीनदिने राजकीय भ्रमणमा आज मध्याह्न यहाँ आइपुग्नुभएका राष्ट्रपति मुखर्जी नेपालका उच्च नेतृत्वसँगको भेटवार्ता व्यस्त रहनुभयो ।

भारतीय राष्ट्रपतिलाई राष्ट्रपति भण्डारीले त्रिभुवन अन्तर्राष्ट्रिय विमानस्थलको अतिविशिष्ट कक्षमा स्वागत गर्नुभएको थियो । विमानस्थलमा राष्ट्रपति मुखर्जीको स्वागतार्थ उपराष्ट्रपति नन्दबहादुर पुन, प्रधानमन्त्री पुष्पकमल दाहाल, परराष्ट्रमन्त्री डा प्रकाशशरण महत र सवारीमन्त्रीसमेत रहनुभएका संस्कृति, पर्यटन तथा नागरिक उड्डयनमन्त्री जीवनबहादुर शाही उपस्थित हुनुहुन्थ्यो ।

एउटै कारमा दुवै राष्ट्रपति 

विमानस्थलको स्वागतपछि दुवै देशका राष्ट्रपति एउटै कारमा सवार भई राष्ट्रपतिको कार्यालय शीतल निवास पुग्नुभएको थियो । मुखर्जीको सवारी हुने रुटमा सुरक्षालाई मध्यनजर गर्दै नेपाली सेनाको हेलिकप्टरले हवाई गस्ती गरेको थियो । कारमा दुवै देशको झन्डा फहराइएको थियो ।

शीतल निवासमा उहाँहरुबीच करिब एक घन्टा वार्ता भयो ।

नेपालमा संविधान जारी भएकामा बधाई 

दुबै राष्ट्रपतिबीचको वार्ता पारस्परिक हितमा केन्द्रित रहेर भएको परराष्ट्र स्रोतले जनाएको छ । भारतका राष्ट्रपति मुखर्जीले नेपालको संविधान जारी भएकामा राष्ट्रपति भण्डारी, नेपाली जनता र संविधानसभाप्रति बधाई ज्ञापन गर्नु वार्ताको उल्लेख्य पक्ष रह्यो ।

भेटवार्तापछि राष्ट्रपति मुखर्जी लैनचौरस्थित भारतीय राजदूतावासको स्वागत कार्यक्रममा सरिक हुनुभयो । दूतावास परिसरमा उहाँले उपराष्ट्रपति पुन, उपप्रधानमन्त्री एवम् अर्थमन्त्री कृष्णबहादुर महरा, नेपाली काँग्रेसका सभापति शेरबहादुर देउवालगायत विभिन्न राजनीतिक दलका नेता, उद्योगी व्यवसायी तथा विभिन्न क्षेत्रका व्यक्तित्वहरुसँग भेट गर्नुभयो । नेपालीसँगको उहाँको आधा घण्टाको भेटघाटले दुई देशबीच जनस्तरमा रहेको सम्बन्धलाई समेत प्रतिबिम्बित गरेको झल्को पाइन्थ्यो ।

त्यसपछि बौद्धस्थित हायात रिजेन्सी होटलमा उहाँले उपराष्ट्रपति पुन र त्यस लगत्तै प्रधानमन्त्री पुष्पकमल दाहालसँग छलफल गर्नुभयो । सौहार्दपूर्ण वातावरणमा भएका ती छलफलमा द्विपक्षीय हित र चासाका विषयमा विचारविमर्श भएको बुझिएको छ ।

भारतका राष्ट्रपति मुखर्जीको सम्मानमा राष्ट्रपति भण्डारीले आजै बेलुकी सोल्टीमोडस्थित होटल सोल्टीमा आयोजना गर्नुभएको रात्रिभोजमा सरिक हुनुभयो ।

त्यस अवसरमा दुवै राष्ट्रपतिले व्यक्त गर्नुभएको सारगर्भित र महत्वपूर्ण विचारले दुई देशबीचको मैत्रीपूर्ण सम्बन्धलाई थप उचाइमा पुरयाउने विश्वास लिइएको छ । विगत सात दशकमा अनेक क्षेत्रमा उल्लेखनीय प्रगति गरेको भारतसँग द्विपक्षीय आर्थिक सम्बन्ध वृद्धि गर्ने नेपाली जनताको इच्छालाई राष्ट्रपति भण्डारीले मुखरित गर्नुभयो । भारतले आफ्ना छिमेकी मुलुकसँगको सम्बन्धलाई विशेष प्राथमिकतामा राखेको उद्गार राष्ट्रपति मुखर्जीबाट व्यक्त भयो । समारोहमा नेपालका विभिन्न संस्कृति झल्कने गीत, सङ्गीत र नृत्य प्रदर्शन गरिएको थियो ।

अठार वर्षपछि भारतीय पक्षबाट भएको उच्चस्तरीय यो भ्रमणबाट नेपाली जनता हर्षित छन् ।

नेपाल भ्रमणको दोस्रो दिन मुखर्जी काठमाडौँ विश्वविद्यालयद्वारा आयोजना हुने सम्मान कार्यक्रम र काठमाडौँ महानगरपालिकाको संयोजनमा हुने नागरिक अभिनन्दन कार्यक्रमा सरिक सरिक हुनुहुनेछ । यसअघि बिहान उहाँको पशुपतिनाथको दर्शन गर्ने कार्यक्रम छ ।