प्रतिभा सम्मान प्रद्युम्न श्रेष्ठ र पुरस्कार बिबी अनुरागीलाई

लण्डन । यसवर्षको प्रतिभा सम्मान साहित्यकार प्रद्युम्न श्रेष्ठ र प्रतिभा पुरस्कार संगीतकार बलबहादुर विश्वकर्मा (बीबी अनुरागी) लाई दिइने भएको छ ।
नेपाली प्रतिभा प्रतिष्ठान, बेलायतका कार्यवाहक अध्यक्ष टंक वनेमको अध्यक्षतामा हालै फार्नबोरोस्थित गोर्खा प्यालेसमा हालै बसेको बैठकले सो घोषणा गरेको हो ।
नेपाली साहित्यलाई लामो समयदेखि सेवा गरेवापत श्रेष्ठलाई प्रतिभा सम्मान दिने निर्णय गरिएको प्रतिष्ठानले जनाएको छ । यसैगरी नेपाली संगीत क्षेत्रमा महत्वपूर्ण योगदान पुर्याएवापत अनुरागीलाई पुरस्कार दिन लागिएको हो ।
प्रतिभा सम्मानवापत श्रेष्ठलाई ताम्रपत्र र २० हजार १ रूपैयाँको सम्मान थैलीे र अनुरागीलाई पुरस्कारवापत ताम्रपत्रको साथमा १ लाख १ रूपैयाँको प्रदान गरिने छ ।
पुरस्कार तथा सम्मान काठमाडौंमा एक समारोहको आयोजना गरी वितरण गरिने प्रतिष्ठानले बताएको छ ।
सन् २००८ देखि प्रदान गर्न थालिएको प्रतिभा सम्मान हालसम्म बेलायतका साहित्यकार स्वर्गीय ईश्वर मानन्धर, साहित्यकार जीवी लुगुन, गायक भक्तराज आचार्य, समालोचक प्रा.डा. गोविन्दराज भट्टराई, गजलकार बुँद राना र कलाकार टेकबिर मुखियाले पाइसकेका छन् भने प्रतिभा पुरस्कार साहित्यकार नविन विभास, गायक कुबेर राई, कवि तथा लेखक उपेन्द्र सुब्बा, कवि श्रवण मुकारुङ, सात्यिकार मोमिला जोशी, पत्रकार राजकुमार दिक्पाल र कवि भूपाल राईले पाइसकेका छन् ।
शुरुमा सम्मानको राशी १० हजार र पुरस्कारको राशी २५ हजार रुपैयाँ रहेकोमा सन् २०१० देखि बढाएर २० हजार १ र १ लाख १ रुपैयाँ पु¥याइएको हो ।
को हुन् प्रद्युम्न श्रेष्ठ ?

 

सन् १९५४ सालमा सिक्किम राज्यको देन्ताम बजारमा जन्मिएका साहित्यकार प्रद्युम्न श्रेष्ठ विगत पाँच दशकदेखि नेपाली साहित्य लेखनमा क्रियाशील छन् । उनका कविता, गीत, निबन्ध र संस्मरण गरी एकदर्जन भन्दाबढी कृतिहरू प्रकाशित छन् भने हिन्दी लगायत विभिन्न भाषाका पुस्तकहरू उनले नेपालीमा अनुवाद गरेका छन् । सिद्वि, हिमाली प्रकाशन, कनका र भानु स्मारिकाजस्ता विभिन्न पत्रपत्रिकाहरू प्रकाशनमा संलग्न श्रेष्ठ सिक्किमका पुराना साहित्यकार मानिन्छन् । नेपाली साहित्य परिषद सिक्किमका पूर्व अध्यक्ष श्रेष्ठ साहित्य अकादमीका सदस्य समेत रहेका छन् भने सिक्किम लगायत भारतका थुप्रै साहित्यिक र सामाजिक संघसंस्थाहरूमा आवद्व छन् । उनी भारत र नेपालका धेरै संघसस्थाहरूबाट सम्मानित तथा पुरस्कृत भइसकेका छन् ।
बिबी अनुरागी

 

पुरस्कृत संगीतकार बिबी अनुरागी पछिल्लो समय नेपाली सांगीतिक क्षेत्रमा लोकप्रिय र सफल ब्यावसायिक संगीतकारको रूपमा परिचित छन् । २० वर्षदेखि नेपाली संगीतमा सकृय अनुरागीले झण्डै सात हजार आधुनिक र केही लोकगीतहरूमा संगीत भरेका छन् । उनको एकल संगीतवद्व १५ गीति एल्बम बजारमा आइसकेका छन् भने दर्जनौं फिल्महरूमा उनको एकल संगीत रहेको छ । २०५१ सालमा रेडियो नेपालबाट स्वर परिक्षा उत्तीर्ण अनुरागीले २५ गीतहरूमा स्वर र २० वटा लोकगीतहरू समेत संकलन गरेका छन् । उनले इमेज अवार्ड तथा नेफ्टा फिल्म अवार्ड जस्ता विभिन्न एफएम, टिभी र संघसंस्थाहरूबाट पुरस्कृत भएका छन् । अनुरागी हाल प्रिज्म डिजिटल रेकर्डिङ स्टुडियो मार्फत नेपाली गीतसंगीतको श्रीवृद्विमा लागि परेका छन् ।