लण्डन । एक्सेस फाइनान्सियल सर्भिसेज युकेले युकेमा बसोबासरत नेपालीहरुलाई अत्याश्यक विषयहरुमा जानकारी दिने उद्देश्यले मोर्गेज, विल र ट्याक्सका बारेमा निशुल्क परामर्श दिएको छ ।
नेपालीहरुको बाक्लो बसोबास रहेको फार्नब्रोमा अाइतबार सम्पन्न पहिलो परामर्श कार्यक्रममा विभिन्न विषयका ज्ञाताहरुले परामर्श दिएका थिए ।
कार्यक्रममा ब्यालेन्स कन्सल्टेन्सीका प्रिन्सिपल सन्दीप एन शाहले विल (इच्छापत्र)का बारेमा जानकारी दिएका थिए । संसारमा कर र मृत्यु मात्र निश्चित भएको बताउँदै उनले आफ्नो मृत्युपछि आफ्नाे जायजेथा कसको नाममा कति कति हिस्सा जाने भन्ने बारेमा पहिल्यै योजना गरिएमा भविष्यमा समस्या नआउनेमा जोड दिए ।
कर परामर्शदाता एसएनपी प्लसका समिरनाथ प्याकुरेलले भाडामा दिने घरका बारेमा विद्यमान कर व्यवस्था र यसमा हुन लागेको परिवर्तनले पार्नसक्ने प्रभावका बारेमा जानकारी दिएका थिए । नेपालीहरुमा करका बारेमा जानकारी नहुँदा पाउने सुविधाबाट पनि वञ्चित भइराखेको उनले थपे ।
सेठी पार्टनरसिपका सोलिसिटर हितेश बी शाहले घर खरिद प्रक्रियामा सोलिसिटरको भूमिकाका बारेमा बताएका थिए ।
टीम एम डेभलपमेण्टका बिज्नेस कोच एन्थोनी मुण्डेले थोरै समयमा कसरी व्यवसाय बढाउने, व्यवसायका साथसाथै परिवार र सामाजिक कार्यलाई कसरी समन्वय गर्ने बारेमा प्रकाश पारेका थिए ।
एक्सेस फाइनान्सिल सर्भिसेजका फाइनान्सियल प्लानर मीन दर्लामीले मोर्गेज, रिमोर्गेज, बाइ टु लेट र इन्स्योरेन्सका बारेमा जानकारी दिएका थिए ।
कार्यक्रममा सहभागीहरुले परामर्शदाताहरुसित प्रश्नोत्तर र व्यक्तिगत समय लिएर आफ्ना समस्या राखेका थिए ।
एक्सेस फाइनान्सिल सर्भिसेजले अर्को सेमीनार २२ नोभेम्बरमा ह्यारो फुटबल क्लवमा आयोजना गर्दैछ ।
