मधेसमा सिके राउतको उदय

काठमाडौँ । दोस्रो जनआन्दोलनदेखि राष्ट्रिय राजनीतिमा पेचिलो बनेको मधेसमा डा सिके राउतको उदयको संकेत देखा परेको छ ।

उनी कुनै समयमा मधेस आन्दोलनका मसिहा उपेन्द्र यादवलाई करिब दोब्बर मतले पराजित गर्दै प्रतिनिधिसभामा निर्वाचित भएका छन् । जनमत पार्टीका उम्मेदवार राउले सप्तरी २ बाट ३५ हजार ४२ मत पाए भने यादवले १६ हजार ९७९ मत मात्र पाए । यादव यसअघि सोही निर्वाचन क्षेत्रबाट निर्वाचित भएका थिए ।

क्याम्ब्रिज विश्वविद्यालयबाट विद्यावारिधी गरका राउत करिब एक दशकअघि नेपाल फर्किएका थिए । शुरुमा मधेसलाई अलग देशको मान्यता दिइनुपर्ने माग राखेर आन्दोलन चर्काएका राउत पटकपटक प्रहरीको दमन, पक्राउ र जेलमा परेका थिए । उनको खुट्टासमेत भाँचिएको थियो ।

केही वर्षअघि सरकारसित सम्झौता गरेर अखण्ड नेपाल मान्न स्वीकार गरेका राउत आगामी दिनमा मधेसको मूलप्रवाह बन्न सक्ने संकेत देखा परेको छ । किनकी यादवका साथै मधेसका अर्का नेता महन्थ ठाकुर र राजेन्द्र महत्तोसमेत यसपटक चुनाव जित्न सास्ती खेपिरहेका छन् ।

राउतले मधेसका केही प्रदेश सदस्य पनि जितेका छन् ।