कीर्तिमानी आरोही निर्मल पुर्जाले पर्वतारोहणमा रचे अर्को कीर्तिमान

लण्डन । पर्वतारोहणमा ख्याति कमाएका कीर्तिमानी आरोही निर्मल पुर्जाले शरद ऋतुमा केटु हिमालको आरोहण गरी अर्को कीर्तिमान बनाएका छन् ।
उनको टोलीले शनिबार साँझ स्थानीय समयअनुसार ५ बजे सो शिखरको सफलतापूर्वक आरोहण गरेका थिए ।
उनीसहित सो टोलीमा मिङ्मा जी शेर्पा, मिङ्मा डेभिड शेर्पा, मिङ्मा तेन्जी शेर्पा, गेल्जे शेर्पा, दावा तेम्बा शेर्पा, पेमछिरी शेर्पा, किलुपेम्बा शेर्पा, दावा तेन्जिङ शेर्पा र सोना शेर्पा रहेका थिए ।
पाकिस्तानमा रहेको सो हिमाल हालसम्म कसैले शरद ऋतुमा आरोहण गर्न सकेको थिएन ।
आरोहणपछि सामाजिक संजालमा असम्भवलाई सम्भव बनाइएको प्रतिक्रिया दिएका छन् । आरोहण दलमा सबै सदस्य नेपाली रहेका छन् ।
आठ हजार मिटरभन्दा माथिका सबै शिखरहरु शरद याममा आरोहण गरिएको भए पनि केटु मात्र आरोहण हुन सकेको थिएन ।
म्याग्दीमा जन्मिएका निर्मल पुर्जा पूर्व गोरखा सैनिक हुन् । उनी गोरखा सैन्यपछि बेलायतको विशेष सेनामा काम गरेका थिए । त्यसपछि पर्वतारोहणमा लाग्न उनले बेलायती सेनाको सो आकर्षक करियर नै त्यागेका थिए ।
उनले यसअघि आठ हजार मिटर अग्ला सबै हिमाल छ महिना छ दिनमा आरोहण गरेर विश्व रेकर्ड कायम गरिसकेका छन् । यसबाहेक पनि उनको पर्वतारोहणमा धेरै विश्व रेकर्ड छन् ।
पर्वतारोहणमा उनको विशेष दक्षताका कारण एसिएन अल्पाइन एसोसिएसनले उनलाई शेर्पा अफ द इयर उपाधिले समेत सम्मान गरिसकेको छ ।