नेप्लिज नर्सेज एसोसिएसन युकेद्वारा नेपालमा तीनवटा भेन्टीलेटर हस्तान्तरण

लण्डन । नेपाल नर्सेज एसोसिएसन युकेले नेपालका तीन वटा अस्पतालमा एक/एक वटा भेन्टिलेटर सहयोग गरेको छ ।

एसोसिएसनका अनुसार नारायणी अस्पताल वीरगन्ज, कोशी अस्पताल विराटनगर र लुम्बिनी अस्पताल बुटवलमा एक/एक थान भेन्टिलेटर हस्तान्तरण गरिएको हो ।

एसोसिएसनले बेलायतमा सहयोग संकलन गरी ती भेन्टिलेटरहरु प्रदान गरेको हो  ।

शुरुमा दुईवटा अस्पतालमा श्वासप्रश्वास सम्बन्धी केही उपकरणहरु सहयोग गर्ने उद्देश्य राखिए पनि सहयोग संकलन प्रभावकारी बन्दै गएपछि एसोसिएसनले भेन्टिलेटर नै प्रदान गरेको हो ।

भेन्टिलेटर कसरी चलाउने भन्ने बारेमा अस्पतालका कर्मचारीहरुलाई इन्जिनियरहरुले तालिम दिइसकेको उल्लेख गर्दै एसोसिएनले कोभिड १९ का बिरामीहरुको उपचारमा भेन्टिलेटरले महत्वपूर्ण सहयोग पुर्याउने विश्वास लिएको छ ।

भेन्टिलेटर खरिदमा १० हजार १४७ पाउण्ड २३ पेन्स लागेको थियो जसमध्ये ६ हजार ३८० पाउण्ड ८२ पेन्स सहयोग उठेको थियो भने बाँकी रकम संस्थाको कोषबाट बेहोरिएको थियो ।

एसोसिएसनले सम्पूर्ण सहयोगदाताहरुमा धन्यवाद ज्ञापन गरेको छ ।