सोमबार, माघ १० २०७८ | Mon, January 24, 2022
नेपालको समय: ०५:३५ | UK Time: 23:50

लण्डनमा ब्रेक्जिट विरोधी प्रदर्शनमा करिब दश लाख सहभागी

रासस/एएफपी
२०७५ चैत ९ गते २३:२९

लण्डन- ब्रेक्जिटबारे अन्यौल कायम रहेका समय संयुक्त अधिराज्य (बेलायत) मा यूरोपियन यूनियनबाट बेलायत बाहिरिनु हुन्न भन्ने समूहले अर्को जनमत सङ्ग्रह माग गर्दै भव्य प्रदर्शन गरेका छन् । 

ब्रेक्जिट विरोधी प्रदर्शनमा करिब दश लाख सहभागी भएको बेलायती अखबारहरुले जनाएका छन्।

प्रदर्शनकारीले ईयू छाड्नुअघि जनतालाई अन्तिम पटक आफ्नो मत जाहेर गर्न अवसर दिन माग गरेका छन् । गत अक्टोबरमा भएको यस्तै खालको प्रदर्शनमा करिब ७ लाख सहभागी थिए ।

इयूबाट बेलायतको बहिर्गमन हुनुहुन्न भन्ने पक्षका लाखौं समर्थक लण्डनको हाइड पार्कमा जम्मा भै मध्य लण्डन हुँदै शहरका विभिन्न स्थानमा पुगेका थिए । 

ब्रेक्जिट बिषयले राजनीतिक अन्यौलता हुँदा यसको प्रभाव सम्पूर्ण क्षेत्रमा देखिन थालेको दावीसहित सहभागीहरूले यस बिषयमा पुनः जनमतसङ्ग्रहको माग गरेका छन् ।

यसैबीच प्रधानमन्त्री मेलाई ब्रेक्जिट रद्द गर्न माग गर्दै शनिबार रातीसम्म ४७ लाख बढि हस्ताक्षर संकलन भएको छ । धारा ५० खारेज गरि ब्रेक्जिट प्रक्रिया रद्द गर्न माग गर्दै शुरु गरिएको हस्ताक्षर अप्रत्यासित रुपमा बढेको हो । 

उता, बेलायती प्रधानमन्त्री टेरेजा मेले आफ्नो ब्रेक्जिट प्रस्तावमा समर्थन जुट्ने अवस्था नआए संसदमा तेश्रो पटक मतदान नहुने जनाउ दिएकी छन् । मेले शुक्रबार सांझ आफ्नो पार्टी टोरीका सबै सांसदहरुलाई एक पत्र लेख्दै आगामी साता हुने तय भएको तेश्रो मतदान कार्यक्रम सम्भवतः नहुने बताएकी हुन् ।

पत्रमा मेले सांसदहरुलाई गम्भीरतापूर्वक सोच्न र वार्ताका लागि पनि आग्रह गरेकी छन् । उनले पत्रमा अब चारवटा विकल्प बांकी रहेको प्रष्टयाएकी छन् । पहिलो उनको ब्रेक्जिट प्रस्ताव आगामी साता पारित गर्ने, दोश्रो समयसीमा बढाउने, तेश्रो धारा ५० खारेज अर्थात ब्रेक्जिट रद्द गर्ने र चौंथो बिना सम्झौता (नो डिल) ईयूबाट बाहिरिने विकल्प बांकी रहेको मेको पत्रमा उल्लेख छ ।

मेको युरोपेली संघबाट बेलायत बाहिरिने प्रक्रिया (ब्रेक्जिट) प्रस्ताव यसअघि दुई पटक संसदबाट अस्वीकृत भइसकेको छ ।

यदि संसदबाट पारित नभए ईयूले बेलायतलाई नयां योजना प्रस्ताव गर्न १२ अप्रिलसम्मको समयसीमा दिइसकेको छ । ब्रेक्जिट प्रस्ताव सांसदहरुले पारित गरे भने ब्रेक्जिट समयसीमा २९ मार्चबाट २२ मेसम्म सार्न २७ ईयू राष्ट्रका नेता सहमत भएका छन् ।

युरोपियन काउन्सिलका अध्यक्ष डोनाल्ड टस्कले ब्रसेल्समा १२ अप्रिलसम्ममा ब्रेक्जिट लामो समयका लागि सर्ने वा रद्द नै हुन सक्ने सम्भावना पनि औंल्याएका छन् ।

ब्रेक्जिट भविष्य हाम्रा ब्रिटिश साथीहरुको हातमा छ । ईयू त प्रतिकुल परिस्थितिको सामना गर्न पनि तयार छ तर राम्रो हुने अपेक्षा गरौं’, उनको भनाई उधृत गर्दै बीबीसीले जनाएको छ ।

प्रतिक्रिया

सम्बन्धित सामाग्री

फेसबुक