बिहीबार, असोज ८ २०७७ | Thu, September 24, 2020
नेपालको समय: १०:४३ | UK Time: 05:58

भारतीय प्रधानमन्त्रीको भ्रमणलाई पर्वका रुपमा मनाउन आग्रह

वीनेपाली
२०७५ वैशाख २५ गते १५:००

 

भारतका प्रधानमन्त्री नरेन्द्र मोदीको जनकपुर भ्रमणवारे जानकारी दिन आयोजित पत्रकार सम्मेलनमा प्रदेश २ का मुख्यमन्त्री लालबाबु राउत । तस्बिर- अजयकुमार साह धनुषा रासस

जनकपुरधाम-प्रदेश नं २ का मुख्यमन्त्री लालबाबु राउतले भारतीय प्रधानमन्त्री नरेन्द्र मोदीको यही वैशाख २८ गते हुने जनकपुरधाम भ्रमणलाई पर्वका रूपमा मनाउन प्रदेशवासीलाई आग्रह गरेका छन् ।

भ्रमणलाई सभ्य र भव्य बनाउन आ–आफ्नो घर अगाडि सरसफाइ गर्न तथा फूलमालाको सजावटसहित पानीले भरिएको पूजा कलश राख्न उनले सर्वसाधारणसँग अनुरोध गरेका छन् ।

प्रदेश सरकार र जनकपुरधाम उपमहानगरपालिकाद्वारा मंगलबार जनकपुरमा आयोजित पत्रकार सम्मेलनमा मुख्यमन्त्री राउतले भारतका प्रधानमन्त्री मोदीलाई बाह्रविघामा गरिने नागरिक अभिनन्दन समारोहस्थलमा सर्वसाधारणलाई प्रवेश गर्न कुनै पासको आवश्यक नपर्ने जानकारी दिए ।

सर्वसाधारणलाई समारोहस्थलमा प्रवेशका लागि उत्तरतर्फको प्रवेशद्वारबाट सहज प्रवेशको व्यवस्था गरिएको बताउँदै उनले समारोहस्थलमा १० बजेसम्म प्रवेश गरिसक्नुपर्ने व्यवस्था गरिएको बताए ।

मुख्यमन्त्री राउतले अभिनन्दन समारोहमा आठ जिल्लाका पाँच लाख नागरिक सहभागी हुने अनुमान गरिएको बताए । जनकपुरधाम उपमहानगरपालिकाका प्रमुख लालकिशोर साहले अभिनन्दन समारोहको युद्धस्तरमा तयारी भइरहेको जानकारी दिए ।

प्रतिक्रिया

सम्बन्धित सामाग्री

फेसबुक