शनिबार, असोज ३ २०७७ | Sat, September 19, 2020
नेपालको समय: २०:५३ | UK Time: 16:08

पार्टी एकता सम्मानजनक र समानताका आधारमा हुन्छ – दाहाल

वीनेपाली
२०७४ चैत १२ गते १६:०१

पुष्पकमल दाहाल ‘प्रचण्ड’

काठमाडौँ-माओवादी केन्द्रका अध्यक्ष पुष्पकमल दाहाल ‘प्रचण्ड’ ले एमाले र आफ्नो पार्टीबीच समानताका आधारमा सम्मानजनक एकता हुने बताएका छन् ।

अखिल नेपाल राष्ट्रिय स्वतन्त्र विद्यार्थी यूनियन (क्रान्तिकारी) को प्रशिक्षण कार्यक्रममा उनले भने, “दुईवटा राजनीतिक विचार र कार्यदिशा भएका राजनीतिक पार्टीबीचको एकता हुने भएकाले सम्मानजनक र समानताका आधारमा हुन्छ र यो एकता प्रक्रियाले छिट्टै निष्कर्ष पाउँछ ।”

दाहालले पार्टी एकताको सन्दर्भमा विचार र राजनीतिको विषयमा सहमति भइसकेको तथा छिट्टै नै संगठनका सन्दर्भमा पनि सहमति हुने बताउँदै पार्टी एकता संयोजन समितिले गठन गरेका दुई वटा कार्यदलले आ–आफ्नो जिम्मेवारीअनुसार काम गरिरहेको बताए । केही दिनभित्रै सम्पूर्ण खाका तयार हुने उल्लेख गर्दै उनले नेपाली जनतालाई नयाँ विश्वास पैदा गर्न एकताको अभियान शुरु गरिएको स्पष्ट पारे ।

उनले नेपालको कम्युनिस्ट आन्दोलनमा एमाले र माओवादी केन्द्रको फरकफरक र महत्वपूर्ण भूमिका रहेको चर्चा गर्दै फरकफरक राजनीतिक धार र चिन्तनबाट स्थापित दुई पार्टीबीचमा एकता हुन लागेको हुँदा दुबै पार्टीको चिन्तनलाई समानजनक स्थान दिइनुपर्ने बताए ।

एकता प्रक्रियालाई शीघ्र निष्कर्षमा पुरयाउने भन्ने धारणा एमाले र माओवादी केन्द्रका नेताहरुबाट सार्वजनिक भइरहेको प्रसंग जोड्दै दाहालले भने, “एकता छिट्टै हुन्छ, त्यसमा कुनै दुविधा राख्नु पर्दैन तर सबै राजनीतिक सांगठिनक विषय त मिलाउनु आवश्यक छ र रहन्छ पनि ।”

अध्यक्ष दाहालले नेपालको कम्युनिस्ट आन्दोलनमा मात्र होइन, विश्व कम्युनिस्ट आन्दोलनमा समेत दुई पार्टीबीचको एकता प्रक्रियाले सकारात्मक प्रभाव पार्ने बताउँदै नेपालको मौलिकता र विशिष्ठताका आधारमा आर्थिक समृद्धिको अभियान अगाडि बढ्ने भएकाले सोहीअनुसारको योजना, कार्यक्रम, नीति ल्याइने धारणा व्यक्त गरे ।

मुलुकमा राजनीतिक स्थायित्व प्राप्त भएकाले नेपाली जनताको भावनाअनुसार अब आर्थिक समृद्धिको अभियानलाई सफल पार्न युवा विद्यार्थीले विशेष योगदान गर्नुपर्नेमा पनि उनले जोड दिए ।

आइतबारदेखि शुरु भएको अखिल (क्रान्तिकारी) को प्रशिक्षणलाई माओवादी केन्द्रका नेता नारायणकाजी श्रेष्ठ, शिक्षामन्त्री गिरिराजमणि पोखरेललगायत नेताहरुले प्रशिक्षण दिएको क्रान्तिकारीका उपाध्यक्ष सुरेन्द्र बस्नेतले जानकारी दिए ।

प्रतिक्रिया

सम्बन्धित सामाग्री

फेसबुक