गुण्डा नाइके मनोज पुन र उनका राइट ह्याण्ड सार्प सुटर आले प्रहरी इन्काउन्टरमा मारिए

बुटवल- दाउद शैलीमा विदेशमा बसेर नेपालमा अपराध सन्जाल चलाइरहेका गुण्डा नाइके मनोज पुन र उनका सहयोगी सोम आले प्रहरी इन्काउन्टरमा बुधबार बिहान मारिएका छन् । रुपन्देहीको देवदहमा बिहान साढे ३ बजे प्रहरीसँगको मुठभेडमा पुन र उनका सहयोगीमाथि प्रहरीले गोली चलाएको बताइएको छ ।

देवदह नगरपालिका–४ भवानीपुरमा गोली लागेर ढलेका दुवै जनालाई लुम्बिनी अञ्चल अस्पताल लगिएकामा अस्पतालले दुवैलाई मृत घोषणा गरेको जिल्ला प्रहरी कार्यालय रुपन्देहीका प्रमुख प्रहरी उपरीक्षक श्याम ज्ञवालीले बताए । पुनको शरीरमा १२ र आलेको शरीरका विभिन्न ठाउँमा १० राउण्ड गोली लागेको प्रहरी मुचुल्कामा उल्लेख छ ।

नेपाल प्रहरी, केन्द्रीय अनुसन्धान ब्यूरो (सिआइबी) को विशेष सूचनाका आधारमा देवदह–४ भवानीपुरमा प्रहरीले गरेको सर्च अपरेशनमा मोटरसाइकलमा सवार दुई जनासँग प्रहरीको मुठभेड भएको प्रहरी उपरीक्षक ज्ञवालीले बताए । प्रहरीले पुनका साथबाट एउटा पेस्तोल पनि बरामद गरेको छ ।

प्रहरीलाई नै आक्रमण गरेर भाग्न खोजेपछि गोली चलाइएको प्रहरी उपरीक्षक ज्ञवालीले बताए ।

पुनलाई गत वर्ष देवदहमा युवा संघका नेता दुर्गा तिवारीको हत्या गरेको, गत असोजमा काठमाडौँमा निर्माण व्यवसायी शरदकुमार गौचनको हत्यामा संलग्न भएको र गत पुस २२ गते देवदहमा काठ व्यवसायी वसन्त पौडेलको हत्या गराएको आरोप लगाइएको छ ।

व्यापारीको हत्या गर्ने र फिरौती असुल्ने धन्दा उनले चलाउँदै आएको अभियोग पनि छ । अभियुक्त पुनलाई पक्राउ गर्न एक वर्ष पहिलेदेखि प्रहरी टोली सक्रिय थियो । सिआइबीले विशेष समूह बनाएर पुनको समूहलाई खोजी गर्दै आएको थियो । तीन वर्षयता मनोज पुन विभिन्न अपराध कर्ममा सक्रिय थिए ।

उनले ठूला ब्यापारीलाई फिरौती माग्दै नदिए ज्यान मार्ने धम्की पनि दिदै आएका थिए ।