राष्ट्रपति, प्रधानमन्त्री र प्रचण्डसँग स्वराजको भेट, पारस्परिक हितमा जोड

राष्ट्रपति विद्यादेवी भण्डारीसँग भारतका विदेशमन्त्री सुष्मा स्वराजले शुक्रबार राष्ट्रपति कार्यालय, शीतल निवासमा शिष्टाचार भेट गर्नुहुँदै । तस्वीर – रोशन सापकोटा, रासस

काठमाडौँ, १९ माघ – राष्ट्रपति विद्यादेवी भण्डारीसँग भारतका बाह्य मामिला मन्त्री सुष्मा स्वराजले आज अपराह्न राष्ट्रपति कार्यालय, शीतल निवासमा शिष्टाचार भेट गर्नुभएको छ ।

त्यस अवसरमा उहाँहरुबीच नेपाल–भारत सम्बन्धका साथै पारस्परिक हितका विविध विषयमा विचारविमर्श भएको राष्ट्रपतिको कार्यालयले जनाएको छ ।

भेटमा राष्ट्रपतिको कार्यालयका परराष्ट्र मामिलाविज्ञ डा मदनकुमार भट्टराई, राष्ट्रपतिको कार्यालयका सचिव भूपेन्द्रप्रसाद पौडेल, परराष्ट्र मन्त्रालयका सचिव शंकरदास बैरागीका साथै स्वराजको भ्रमण दलका सदस्यहरुको उपस्थिति थियो ।

प्रधानमन्त्री देउवासँग शिष्टाचार भेटवार्ता

प्रधानमन्त्री शेरबहादुर देउवासँग भारतका विदेशमन्त्री सुष्मा स्वराजले शुक्रबार प्रधानमन्त्री निवास बालुवाटारमा शिष्टाचार भेटवार्ता गर्नुहुँदै । तस्वीर – रोशन सापकोटा, रासस

भारतका विदेशमन्त्री स्वराजले प्रधानमन्त्री शेरबहादुर देउवासँग पनि शिष्टाचार भेटवार्ता गर्नुभएको छ । प्रधानमन्त्री निवास बालुवाटारमा भएको भेटमा उहाँहरुबीच नेपाल–भारत सम्बन्धका साथै पारस्परिक हितका विविध विषयमा विचारविमर्श भएको प्रधानमन्त्री देउवाका परराष्ट्र सल्लाहकार डा दिनेश भट्टराईले जानकारी दिनुभयो ।

सो अवसरमा प्रधानमन्त्री देउवाले मैत्रिपूर्ण भेटवार्ताले दुई देशबीचको आपसी सम्बन्ध आगामी दिनमा अझ सुदृढ र प्रगाढ हुने विश्वास व्यक्त गर्नुभयो ।

भेटमा विदेशमन्त्री स्वराजले नेपालले नयाँ संविधानअनुसार स्थानीय, प्रादेशिक र राष्ट्रिय निर्वाचन सफलतापूर्वक सम्पन्न गरेकोमा बधाई दिँदै यसले नेपालमा लोकतन्त्र संस्थागत होस् भनी शुभकामना दिएको परराष्ट्र सल्लाहकार डा भट्टराईले बताउनुभयो ।

मुलुकको विकास र स्थायित्वमा प्रचण्डको जोड

नेकपा माओवादी केन्द्रका अध्यक्ष पुष्पकमल दाहाल र भारतीय विदेशमन्त्री सुष्मा स्वराज नेपालको दुईदिने भ्रमणका क्रममा शुक्रबार भेटवार्ता गर्दै । तस्वीर – प्रदीपराज वन्त, रासस

नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले मुलुकको विकास र राजनीतिक स्थायित्व आफ्नो पहिलो प्राथमिकता भएको बताउनुभएको छ ।

नेपाल भ्रमणमा रहनुभएकी भारतको बाह्य मामिलामन्त्री स्वराजसँग आज भएको भेटमा उहाँले भन्नुभयो – ‘नेपालको विकास र स्थायित्व आफ्ना पहिलो प्राथमिकता रहेको छ ।’

निर्वाचनपछिको वातावरण तथा सरकार गठनबारे पनि आफूहरुबीच छलफल भएको भेटपछि सञ्चारकर्मीसँग संक्षिप्त कुरा गर्दै पूर्वप्रधानमन्त्री प्रचण्डले भन्नुभयो ।

नेपालको राजनीतिक स्थायित्व र विकास भारतको चाहना भएको दोहोरयाउँदै मन्त्री स्वराजले त्यसमा भारतले सक्दो सहयोग गर्ने प्रतिबद्धता व्यक्त गर्नुभयो ।

साथै उहाँले संघीय र प्रादेशिक संसद्मा वाम गठबन्धनलाई बहुमत प्राप्त भएकामा हार्दिक बधाई ज्ञापन गर्नुभएको अध्यक्ष प्रचण्डले बताउनुभयो ।

दुईदिने नेपाल भ्रमणका लागि बिहीबार यहाँ आइपुग्नुभएकी विदेशमन्त्री स्वराजले बिहीबार नेकपा (एमाले) का अध्यक्ष केपी शर्मा ओलीलगायत नेताहरुसँग भेटवार्ता गर्नुभएको थियो । स्वराजसँग बिहीबार राष्ट्रिय जनता पार्टी नेपालका नेताहरु र आज संघीय समाजवादी फोरम नेपालका अध्यक्ष उपेन्द्र यादवले भेटवार्ता गरेका थिए ।