काठमाडौं- ५९ राष्ट्रियसभाका सदस्यमध्ये ५६ जनाका लागि २४ माघमा निर्वाचन हुँदैंछ । बुधबार त्यसका लागि उम्मेदवारी दर्ताको कार्यक्रम सात वटै प्रदेशमा सम्पन्न भएको छ ।
५६ मध्ये १७ जना निर्विरोध निर्वाचित भएका छन् । उम्मेदवारी दर्ता भएकाहरुमध्येबाट १७ जना निर्विरोध निर्वाचत भए पनि तिनीहरुको औपचारिक घोषणा भने निर्वाचन आयोगले दाबी विरोध सकिएपछि गर्ने सम्भावना छ ।
प्रदेश नं. १, २, ५ र ७ बाट केही सांसदहरु निर्विरोध भएका हुन् । अन्य ३, ४, ६ नं. प्रदेशका भने ८ वटै सिटमा निर्वाचन हुनेछ ।
१ नं. प्रदेशबाट तीन वटा महिला सांसद निर्विरोध भएका छन् । उनीहरु विरुद्ध उम्मेदवारी नै परेको छैन् । निर्विरोध हुनेमा एमालेकी नैनकला ओझा, कांग्रेसकी सरिता प्रसाई र माओवादीकी विना पोखरेल रहेका छन् ।
यस्तै, प्रदेश नं. २ बाट पाँच जना निर्विरोध निर्वाचित भएका छन् । जसमा तीन जना महिला, एक जना दलित र अल्पसंख्य कोटामा पनि निर्विरोध भएका छन् । महिलाबाट फोरमकी प्रमिला यादव, माओवादीकी शशीकला दाहाल र कांग्रेसकी मुक्ताकुमारी यादव निर्विरोध भएका हुन् दलितबाट फोरमका रामप्रीत पासवान निर्विरोध भए भने अल्पसंख्यकबाट राजपाका वृषेशचन्द लाल निर्विरोध भए ।
यस्तै, प्रदेश नं ५ बाट तीन जना महिला सांसद निर्विरोध भएका छन् । एमालेबाट कोमल वली, मीना बुढा र कांग्रेसबाट अनिता देवकोटा निर्विरोध हुने भाग्यमानी भएका छन् ।
७ नं. प्रदेशबाट भने तीन खुल्ला र ३ जना महिला सांसद निर्विरोध भए । खुल्लातर्फ एमालेका शेरबहादुर कुँवर, माओवादीका हरिराम चौधरी र कांग्रेसका बद्री पाण्डे निर्विरोध भए भने महिलातर्फ एमालेकी कमला ओली, इन्दु कडेरिया विष्ट र कांग्रेसकी तारादेवी भट्ट निर्विरोध भएका छन् ।
निर्विरोध हुनेहरुको औपचारिक घोषणा केही दिनपछि मात्रै हुने निर्वाचन आयोगले जनाएको छ ।
