सरकारले तोक्यो प्रदेशका प्रमुख र अस्थायी राजधानी, यी हुन् प्रदेश प्रमुख र अस्थायी राजधानी

काठमाडौं—सरकारले ७ वटा प्रदेशका प्रदेश प्रमुख र अस्थायी राजधानी तोकेको छ । बुधबार प्रधानमन्त्री निवास बालुवाटारमा बसेको मन्त्रिपरिषदको बैठकले प्रदेशका अस्थायी राजधानी र प्रमुख तोकेको हो ।

कानुनमन्त्री यज्ञबहादुर थापाकाअनुसार प्रदेश नं. १ को अस्थायी राजधानी विराटनगर, प्रदेश नं. २ को जनकपुर, प्रदेश नं. ३ को हेटौडा, प्रदेश नं. ४ को पोखरा, प्रदेश नं. ५ को रुपन्देही, प्रदेश नं. ६ को सुर्खेत र प्रदेश नं. ७ को मुकाम धनगढीलाई तोकिएको छ ।

यस्तै, बैठकले लामो कसरतपछि प्रदेश प्रमुखको पनि टुंगो लगाएको छ । प्रदेश प्रमुखमा कांग्रेस र मधेशवादी दलले भागबण्डा गरेका छन् । प्रदेश नं. १ को प्रमुखमा गोविन्द सुब्बा, प्रदेश नं. २ को प्रमुखमा रत्नेश्वरलाल कायस्थ, प्रदेश नं. ३ को प्रमुखमा अनुराधा कोइराला, प्रदेश नं. ४ को प्रमुखमा बाबुराम कुँवर नियुक्त भएका छन् ।

यस्तै, प्रदेश नं. ५ को प्रमुखमा उमाकान्त झा, प्रदेश नं. ६ को प्रमुखमा दुर्गाकेशर खनाल र प्रदेश नं. ७ को प्रमुखमा मोहन मल्ल नियुक्त भएका छन् । प्रदेश नं. २ को प्रमुख नियुक्त भएका रत्नेश्वरलाल कायस्थ संघीय समाजवादीको कोटाबाट र ५ नं. प्रदेश प्रमुखमा नियुक्त उमाकान्त झा राजपाको कोटाबाट नियुक्त भएका हुन् ।

प्रमुख नियुक्त भएसँगै निर्वाचन आयोगलाई प्रदेशको परिणाम घोषणा गर्ने र राष्ट्रिय सभाको निर्वाचन तोकिएको मितिमा गर्ने बाटो फराकिलो बनेको छ ।