शनिबार, कार्तिक १५ २०७७ | Sat, October 31, 2020
नेपालको समय: ०१:३९ | UK Time: 19:54

पार्टी एकताबारे ओली र प्रचण्डबीच भेटवार्ता

रासस
२०७४ पुष २४ गते २:०५

ओली प्रचण्ड फाइल तस्विर- रासस

भक्तपुर, २३ पुस – नेकपा (एमाले) का अध्यक्ष केपी शर्मा ओली र नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ बीच ओली निवास, बालकोटमा भेटवार्ता भएको छ । साँझ सवा ६ बजे ओली निवास पुग्नु भएका प्रचण्ड र ओलीबीच करिब डेढ घण्टा भएको भेटवार्तामा पार्टी एकतालाई कसरी निष्कर्षमा पुरयाउने भन्ने र नयाँ सरकार निर्माण एवं राष्ट्रियसभा गठनबारे गम्भीर छलफल भएको छ ।

भेटपछि सञ्चारकर्मीलाई प्रतिक्रिया दिँदै माओवादी केन्द्रका अध्यक्ष दाहालले मुख्य रुपमा पार्टी एकतालाई निष्कर्षमा पुरयाउनेबारे छलफल भएको बताउनुभयो । उहाँले पार्टी एकतालाई निष्कर्षमा पुरयाउनै पर्छ भन्नेमा आफूहरु बीच छलफल भएको बताउँदै त्यसका लागि सोमबार आ-आफ्नो पार्टीभित्र छलफल गरेर मंगलबार पार्टी एकता संयोजन समितिको बैठक बस्ने सहमति भएको जानकारी दिनुभयो ।

अध्यक्ष दाहालले पार्टी एकता संयोजन समितिबाट पार्टी एकता प्रक्रियालाई छिट्टै टुंगोमा पुरयाउनका लागि वैचारिक, राजनीतिक र सांगठनिक काम दुईवटै गर्नका निम्ति एउटा टिम बनाएर जिम्मा दिने र केही दिनभित्र पार्टी एकता प्रक्रियालाई निष्कर्षमा पुरयाउनेबारे दुई अध्यक्षबीच सहमति भएको जानकारी दिनुभयो ।

अब बन्ने एकीकृत पार्टीको अध्यक्ष र सरकारको नेतृत्व आलोपालो गर्ने वा नगर्ने तथा कस्तो वैचारिक संगठनात्मक आधारमा एकता गर्ने भन्नेमा नेताहरुबीच फरक फरक धारणा आउँदा ओली र प्रचण्डबीच भेटवार्ता भएको हो ।

भेटमा दुई पार्टीका अध्यक्ष ‘वान टु वान’ (सहयोगी बिना) वार्तामा बस्नु भएको थियो । एमाले अध्यक्ष ओली नियमित स्वास्थ्य परीक्षणका लागि बुधबार बैंकक जाने तय भएपछि त्यसअघि नै समझदारीको प्रयास स्वरुप भेटवार्ता भएको बताइएको छ ।

प्रतिक्रिया

सम्बन्धित सामाग्री

फेसबुक