झलनाथ खनाल ५ औं पटक विजयी, कमल थापा पराजित

काठमाडौं । पूर्व प्रधानमन्त्री तथा नेकपा (एमाले) का वरिष्ठ नेता झलनाथ खनाल इलाम क्षेत्र नं. १ बाट विजयी भएका छन् । शनिबार सम्पन्न मतगणनामा खनालले ३६ हजार ८ सय ७ मत प्राप्त गरेर ५ औं पटक विजयी भएका हुन् । खनाल २०४८ यताका निर्वाचनमा २०५६ बाहेक सबैमा विजयी भएका छन् ।

खनालका प्रतिष्पर्धी कांग्रेस उम्मेदवार भूपेन्द्र कट्टेलले १९ हजार ६ सय ३७ मत प्राप्त गरेका छन् ।

कमल थापा पराजित

उता, मकवानपुर क्षेत्र नम्बर १ बाट कमल थापालाई हराउंदै एमाले उम्मेदवार कृष्ण दाहाल चिर्वाचित भएका छन् । दाहालको मकवानपुरबाट यो तेश्रो जित हो ।

अन्तिम निर्वाचन परिणामअनुसार दाहालले ४० हजार ६ सय ३० मत पाएका छन् भने थापाले ३४ हजार ५ सय ५८ मत पाएका छन् ।

उपप्रधान तथा ऊर्जा मन्त्री थापा अन्तिम पटक २०५१ मा मकवानपुरबाट निर्वाचित सांसद भएका थिए । त्यसयता उनी लगातार पराजित छन् । उनी पछिल्लो संविधान सभा निर्वाचनमा समानुपातिक सूचीबाट सांसद भएका थिए ।

त्यस्तै क्षेत्र नं. १ प्रदेश ‘ख’ तर्फ एमालेका काजिमान कागते विजयी भएका छन् । उनले १७ हजार ८ सय ९६ मत प्राप्त गरे । दोस्रो भएका कांग्रेसका दुर्गा बरालले १० हजार ३१ मत पाएका छन् ।

पूर्व गृहमन्त्री पूर्णबहादुर खड्का पराजित

सुर्खेतको क्षेत्र नम्बर १ मा कांग्रेस उम्मेदवार पूर्व गृहमन्त्री पूर्णबहादुर खड्का पराजित भएका छन् । उनलाई पराजित गर्दै एमाले उम्मेदवार ध्रुवकुमार शाही विजयी भएका हुन् । शाहीले ३६ हजार ७ सय ५९ मत पाएका छन् भने खड्काले ३३ हजार ३ सय ७७ मतमात्र पाए ।