पछारिए हेभीवेट, गगन थापा विजयी

गगनकुमार थापा । तस्बिर – रोशन सापकोटा, रासस

काठमाडौं । आशा गरिएका शीर्षस्थ नेताहरु यसपटकको निर्वाचनमा पराजित भएका छन् । प्राप्त विवरण अनुसार, मोरङ क्षेत्र नम्बर ६ बाट एमाले उम्मेदवार लालबाबु पण्डित प्रतिनिधि सभा सदस्यमा विजयी भएका छन् । उनले कांग्रेस नेता शेखर कोइरालालाई ६ सय ७५ मतान्तरमा पराजित गरेका हुन् ।

पण्डितले ३३ हजार ९ सय ४१ मत पाए भने कोइरालाले ३३ हजार २ सय ६६ मत पाए ।

उता, काठमाडौं ८ बाट एमाले उम्मेदवार जीवनराज श्रेष्ठ विजयी भएका छन् । उनले १३ हजार ३ सय ०७ मत पाए । उनका निकटतम प्रतिद्वन्द्वी कांग्रेस उम्मेदवार नवीन्द्रराज जोशीले १२ हजार ९ सय ५३ मत पाए ।

ताप्लेजुङबाट योगेश भट्टराई 

एमाले नेता योगेश भट्टराई ताप्लेजुङबाट प्रतिनिधि सभा सदस्यमा विजयी भएका छन् । उनले २९ हजार ४ सय ७९ मत पाएका छन् । कांग्रेस उम्मेदवार केशवप्रसाद दाहाललाई पछि पार्दै भट्टराई विजयी भएका हुन् । दाहालले १६ हजार ८ सय ८८ मत पाएका छन् ।

प्रकाशमान सिंह विजयी, रबीन्द्र मिश्र पराजित 

बहुचर्चित काठमाडौं क्षेत्र नम्बर १ बाट प्रतिनिधि सभा सदस्यका लागि कांग्रेस नेता प्रकाशमान सिंह विजयी भएका छन् । उनले निकटतम प्रतिस्पर्धी विवेकशील–साझाका उम्मेदवार रबीन्द्र मिश्रलाई पराजित गरेका हुन् । मिश्र ८ सय १८ मत अन्तरले पराजित भए । सिंहले १० हजार ९ सय ३६ मत र मिश्रले १० हजार १ सय १८ मत पाए । बाम गठबन्धनका तर्फबाट उम्मेदवार भएका अनिल शर्माले ५ हजार ३ सय ३६ मत पाए ।

कांग्रेस नेता गगन थापा विजयी

यसैबीच, काठमाडौं क्षेत्र नम्बर ४ बाट प्रतिनिधि सभा सदस्यका लागि नेपाली कांग्रेस नेता गगन थापा विजयी भएका छन् । उनले एमाले उम्मेदवार राजन भट्टराईलाई ३ हजार ४ सय १८ मतले पछि पार्दै विजयी भएका हुन् ।

थापाले २१ हजार ५ सय ५८ मत पाए भने उनका प्रतिष्पर्धी भट्टराईले १८ हजार १ सय ४० मत पाए ।

जनार्दन शर्मा निर्वाचित
यसैबीच, रुकुम पश्चिमबाट प्रतिनिधि सभा सदस्यमा जनार्दन शर्मा निर्वाचित भएका छन् । शर्माले निकटतम प्रतिद्वन्द्वी कांग्रेसका गोपालजीजंग शाहलाई १८ हजार ७ सय ४३ मतान्तरमा पराजित गरे । शर्माको पक्षमा ३४ हजार ४ सय २ मत आएको छ भने गोपालजीजंग शाहले १५ हजार ६ सय ५९ मत ल्याएका छन् ।

हालसम्म घोषणा भएका मत परिणाम अनुसार सबैभन्दा बढी मतान्तरमा जित्ने शर्मा छन् । ५५ हजार ३ सय ८५ मत खसेकामा ५१ हजार ९ सय १५ मत सदर भएको छ भने तीन हजार चार सय ७० मत बदर भएको इकान्तिपुरमा खबर छ ।

प्रतिक्रिया

सम्बन्धित सामाग्री