हिंसात्मक घटनाप्रति गृहको भत्र्सना

काठमाडौँ, १८ मंसिर (रासस) – गृह मन्त्रालयले निर्वाचनका समयमा विभिन्न जिल्लामा भएका हिंसात्मक घटनाप्रति भत्र्सना गरेको छ ।

आज काठमाडौँ क्षेत्र नं ४ का प्रतिनिधिसभाका उम्मेदवार गगनकुमार थापाको चुनावी कार्यक्रममा विस्फोट गराई उम्मेदवार, कार्यकर्ता र निर्दोष सर्वसाधारण घाइते हुनेगरी गराइएको आपराधिक घटनाको मन्त्रालयले कडा भत्र्सना गरेको छ ।

मन्त्रालयले त्यसअघि विभिन्न जिल्लामा घटाइएका उम्मेदवार लक्षित विस्फोटका घटनाको पनि भत्र्सना गरेको छ । मन्त्रालयले घाइतेको शीघ्र स्वास्थ्य लाभको कामना गरेको छ । आज दिउँसो बूढानीलकण्ठ २ माथिल्लो भंगाल चपलीमा घरदैलो कार्यक्रमका क्रममा थापामाथि विस्फोट भएको थियो ।

मन्त्रालयले सबै सुरक्षा संयन्त्रलाई क्रियाशील गराइरहेको सन्दर्भमा भयरहित वातावरणमा उत्साहजनकरूपमा निर्वाचनमा सहभागी हुन सबैमा अनुरोध गरेको छ ।

‘निर्वाचनलाई स्वच्छ, निष्पक्ष, शान्तिपूर्ण र भयरहित वातावरणमा सम्पन्न गराउन सुरक्षा निकाय र सम्बद्ध सबै पक्ष क्रियाशील रहेकाले निर्वाचन विरोधी आपराधिक हर्कत नियन्त्रण गरी शान्तिपूर्ण निर्वाचनको वातावरण बनाउन कानुनबमोजिम कडा कारबाही गर्न कुनै कसुर बाँकी नराख्ने प्रतिबद्धता व्यक्त गर्दछौँ’- मन्त्रालयद्वारा जारी विज्ञप्तिमा भनिएको छ ।